•A conselleira de Medio Rural estivo en Quiroga para visitar unha explotación apícola

Quiroga foi a protagonista da visita que a conselleira de Medio Rural, Ángeles Vázquez, realizou a comezos deste mes. A responsable de Medio Rural visitou as instalacións da explotación apícola Cauru Sociedade Cooperativa Galega, e anunciou que a Xunta vai incrementar o ano que vén nun 16% o importe das axudas que destina ao fomento desta actividade. Este ano, foron 13 os beneficiarios das axudas de Medio Rural para a apicultura, cun importe total de 445.896 euros.
Vázquez, que estivo acompañada pola directora xeral de Gandaría, Agricultura e Industrias Agroalimentarias, Belén do Campo, destacou que na próxima convocatoria incluirase, como novidade, a posibilidade de apoiar investimentos relacionados coa loita contra a vespa velutina. Tamén se continuará coas liñas de axudas xa existentes, como a asistencia técnica aos apicultores, a loita contra a varroase e a racionalización da transhumancia. Os beneficiarios destas axudas son titulares de explotacións apícolas, cooperativas, organizacións representativas e asociacións de apicultores.•