•Conde visitou as instalacións da empresa decana do calzado en Galicia, que comezou a funcionar en 1899

• O 11 de xullo, o conselleiro de Economía, Emprego e Industria, Francisco Conde, visitou as instalacións da empresa monfortina Industrias Losal, a máis antiga de Galicia en funcionamento dentro do sector do calzado. Esta firma, fundada en 1899, segue a ser, segundo afirmou o conselleiro, un «referente» das empresas familiares galegas «que busca crecer nos mercados globais a través da tradición e a innovación, e dun produto diferenciado e de calidade».

«CALIDADE E PERSONALIZACIÓN»
Conde destacou así mesmo o «potencial deste proxecto de quinta xeración», que leva producidos máis de 7.000 modelos de zapatos dende a súa apertura a finais do século XIX. O conselleiro suliñou que «Industrias Losal conseguiu incrementar a súa facturación e o emprego durante a etapa de crise económica mediante a calidade, a personalización e intentando responder a unha demanda moi concreta». Conde afirmou que Industrias Losal «é un exemplo a seguir para converter Monforte na capital do zapato artesanal en Galicia e España». Sinalou que a empresa traballa a través da calidade do produto e investindo en innovación co obxectivo de aumentar a súa facturación nun 20%.

INNOVACIÓN E ESPECIALIZACIÓN
Conde tamén destacou a participación de Industrias Losal no proxecto Protgal, do programa Innterconecta, para a prescrición, deseño e fabricación de calzado para pés con necesidades especiais. Tamén referiuse á iniciativa Handcrafted, que a compañía puxo en marcha recentemente para facer zapatos artesanais a medida, con ferramentas como un dixitalizador 3D que permite tomar medidas exactas de cada pé. “A través da dixitalización, elabora un produto a medida e de calidade artesá que lle permite ter un produto con demanda no mercado e co que poder seguir medrando”, engadiu o conselleiro. Losal produce ao ano entre 9.500 e 10.500 pares de calzado.
O conselleiro destacou que Galicia é terceira na produción de calzado nacional, só por detrás de Valencia e Cataluña. Ademais, lembrou que a exportación deste produto dende Galicia ten medrado un 5% desde 2009. •