•Durante a fin de semana do 8 ao 10 de xullo, Sarria foi a capital da hípica galega coa celebración do Concurso Nacional de Saltos.
RECORD DE PARTICIPACIÓN NESTA TERCEIRA EDICIÓN
A terceira edición da proba sarriana reuniu a 160 xinetes e 180 cabalos, nun record de participación deste evento, co que arranca a Ruta Astur Galaica 2016. Xinetes procedentes de Portugal, País Vasco ou Madrid tomaron parte nas 18 probas deste Concurso Nacional Hípico de Saltos, que está a converterse nunha reunión deportiva referente en Galicia.
PROMOCIONAR O CAMIÑO DE SANTIAGO E A VILA DE SARRIA
Ademais do número de participantes, estímase que asistiron á proba preto de 20.000 persoas, ao longo dos tres días de competición. Por outra banda, este evento xerou preto de 900 reservas hoteleiras en toda a comarca.
Un dos obxectivos do Concurso Nacional Hípico de Saltos de Sarria é dar a coñecer a vila xacobea, así como promocionar o Camiño de Santiago e a súa singularidade ao seu paso por Sarria.
APOIO PROVINCIAL A ESTE EVENTO
A terceira edición do Concurso Nacional Hípico de Saltos de Sarria contou co apoio da Deputación de Lugo, que aportou unha achega económica de 1.800 euros dende a área de Deporte. Pola súa banda, a área de Cultura do organismo provincial colaborou tamén con este evento, cedendo pezas de artesanía elaboradas polo alumnado do CENTRAD, e que foron entregadas como trofeo aos gañadores das diferentes categorías. Así mesmo, a Fundación TIC colaborou a través da realización dunha reportaxe que se difundiu polas redes sociais.•
Cargando ...
