A Deputación de Lugo supera o obxectivo marcado de investimento en xullo, con máis de 15 millóns de euros

Logo de aprobar os Orzamentos de 2016 no mes de xuño, o Goberno provincial vén de inxectar na provincia máis de 15 millóns de euros durante o mes de xullo. “O presidente da Deputación tiña marcado como obxectivo achegar a todos os Concellos 11 millóns de euros en xullo, e superamos este investimento”, explicou o voceiro do equipo de Goberno, Álvaro Santos Ramos.
Entre os máis destacados, Santos destacou os investimentos do Plan de Obras e Servizos 2016, dotado con 5,5 millóns de euros para 87 obras en todos os Concellos, así como o Plan de aforro enerxético, dirixido aos 66 Concellos de menos de 20.000 habitantes, dotado con 1,5 millóns de euros. Por outra banda, aprobouse o plan de Axudas ao Fogar, que conta cun orzamento de 1,5 millóns de euros para reforzar e mellorar o Servizo a Domicilio en 66 Concellos “que non reciben nin un só euro por parte da Xunta de Galicia”, destacou Santos Ramos.
Así mesmo, o voceiro provincial suliñou a posta en marcha do DepuEmprego,o plan de emprego da Deputación nos Concellos, que conta con 3 millóns de euros, ademais das 128 axudas aprobadas, dotadas con 1,4 millóns de euros, para Concellos, asociacións e entidades sen ánimo de lucro coas que impulsar a súa actividade para o fomento do emprego e da economía da provincia.
No eido tecnolóxico, aprobouse o Plan de mellora nas Sedes Electrónicas dos Concellos, dotados con 300.000 euros, para adaptalas á lei que entrará en vigor a finais deste ano. En servizos, destaca a posta en marcha do Plan de Roza das estradas provinciais, con 700.000 euros.•