• Quiroga entrou ao grande no mapa das carreiras populares coa estrea, o pasado 30 de xullo, dunha proba nocturna en trazado non urbano. A I Night Trail congregou a máis de 200 participantes nas dúas modalidades de 16 e 8 quilómetros, que puideron escoller entre andaina ou carreira.
PERCORRIDO POLA NATUREZA
A comitiva partiu ás 22,00 horas dunha abarrotada Praza de España, para percorrer a contorna natural da vila de Quiroga, o trazado do Camiño de Inverno a Santiago e a Ruta da Encomenda, pasando por lugares emblemáticos como o Castelo de Torrenovaes ou a igrexa da Ermida, nun trazado de camiños e pasos a través da natureza.
Según explicaron dende o Concello, os participantes amosaron a súa satisfacción pola realización desta proba, ademais de resaltar a espectacularidade do trazado, e o traballo dos voluntarios, que coidaron ata o máis mínimo detalle. Ao remate, público e participantes puideron disfrutar dun fin de festa con pancetada e dj.
Os gañadores dos premios aos mellores corredores locais foron Mariano Álvarez Soto e María Rodríguez en 16 quilómetros, e Alejandro Casanova e Rebeca Piñeiro en 8. Dende o Concello de Quiroga manifestaron o seu agradecemento a todos os patrocinadores e voluntarios.•
