• O pasado 2 de agosto, o alcalde de Quiroga, Julio Álvarez, e a conselleira de Infraestruturas e Vivenda, Ethel Vázquez, asinaron o convenio para a adhesión deste municipio ao Programa de Vivendas Baleiras. Con este acordo, Quiroga será o primeiro concello da provincia de Lugo en sumarse a este programa, que pretende crear unha bolsa de vivendas baleiras para alugueiro social, incorporando as vivendas de organismos, particulares e empresas que non se atopen habitadas contando, para isto, coa colaboración das Administracións locais.
Segundo precisou a conselleira, este convenio fixa un prezo máximo da renda do alugueiro, que será de 250 euros no Concello de Quiroga, e a contía virá determinada polas características da vivenda e polas circunstancias particulares dos beneficiarios.
Ehtel Vázquez explicou que o obxectivo é que o alugueiro resulte de interese, tanto para o arrendador como para o arrendatario de xeito que ao propietario lle compense incorporar a vivenda baleira a este programa pola renda que vai recibir, e que o beneficiario pague un alugueiro asequible, e tamén compatible con outras axudas que poida percibir, tanto do Concello como da Xunta.•
Cargando ...
