• O Concello de Ribas de Sil está a ofrecer ao longo dos meses de verán unha ampla programación lúdico-cultural, que se completa coa celebración das Festas Patronais, os días centrais de agosto.
O venres 12 de agosto, terá lugar no Anfiteatro da Praia Fluvial o espectáculo de animación á lectura “Conto contigo”, a cargo de Manuel Solla, a partir das oito da tarde. A xornada completarase cun concerto do grupo monfortino Gin Tonic’s.
PROGRAMA DAS PATRONAIS
As Festas Patronais celebraranse do 13 ao 15 de agosto. O sábado día 13, iniciaranse as actividades, coa tradicional Subida Ciclista a Torbeo, a partir das 17,30 horas. Xa ás oito, na Praza do Concello o Contacontos Tirititraum porá en escea o espectáculo “Contacontos Musical”, no que se mistura a arte de contar historias coa música da rumba, para o disfrute de toda a familia. A continuación, ofrecerase unha paella xigante, e a xornada rematará coa actuación da Banda Folk de Ribas de Sil.
O domingo 14 iníciase coa Festa da Infancia, que ofrecerá inchables na Praia Fluvial de 11,30 a 13,30 e pola tarde de 17,30 a 20,00 horas. Xa ás oito, haberá outro espectáculo familiar, “O ferreiro e o diaño”, a cargo de Títeres Cascanueces, no Anfiteatro. Para rematar o día, a Banda de Música de Sober actuará na Praza do Concello ás doce da noite.
O luns 15 de agosto poderase disfrutar, na Praza do Concello e ás doce da noite, do espectáculo de monólogos de humor “A vida pasa voando”, a cargo de Dinamoteatro. Un espectáculo onde se mistura o humor, a música e a interacción co público.
HUMOR PARA ADULTOS
A programación lúdico-cultural volve o sábado 20, cando a partir das oito da tarde, Dinamoteatro poña en escea, no Anfiteatro da Praia Fluvial, o espectáculo “Radio Torreiro”, destinado ao público adulto, no que se repasará a cultura festiva dos galegos e as tolas sorpresas que depara a súa retransmisión radiofónica.
MAXIA PARA TODA A FAMILIA
A maxia para os máis cativos e o público familiar terá o seu espazo o domingo 21 ás 20 horas no Anfiteatro de San Clodio. O Mago Charlangas ofrecerá o espectáculo “@Temporal Infantil”, no que se mistura a maxia e o teatro, a través dos experimentos do Científico Chiflado e das viaxes do Pirata Barbanegra.
A programación de agosto en Ribas de Sil pecharase cun espectáculo de monicreques, o domingo 28, no Anfiteatro a partir das oito da tarde. A compañía Títeres Cascanueces porá en escea a obra “Barriga Verde contra o Estragapandeiro”, con contos, música e sorpresas.•
