• O municipio de Pantón vai acometer unha nova infraestrutura para mellorar a seguridade vial de peóns e condutores na contorna urbana de Ferreira. Nesta ocasión, as obras suporán a construción de beirarrúas na rúa Ourense,  que corresponde ao tramo urbano da N-120 entre o centro da capitalidade e o cruce de Sober, á altura do Mosteiro das Bernardas.

FINANCIAMENTO DA XUNTA DE GALICIA
Estes traballos estarán financiados a través dun convenio de colaboración asinado o pasado 30 de xullo entre a conselleira de Infraestruturas e Vivenda, Ethel Vázquez, e o alcalde de Pantón, José Luis Álvarez. En virtude deste convenio, a Xunta aportará, a través da Consellería, máis de 230.000 euros, cos que se financiarán os traballos. Pola súa banda, o Concello de Pantón asumirá a redación do documento técnico para o proxecto, así como a contratación e execución das obras.
MÁIS SEGURIDADE E MELLOR MOBILIDADE
Segundo explicaron dende a Consellería, este tramo, polo que se accede ao Mosteiro das Bernardas, presenta beirarrúas en Ferreira interrompidas por un estreitamento na estrada, xerado pola presenza dun alpendre. As obras van mellorar a seguridade e a mobilidade de veciños e visitantes. Con este fin, vaise demoler o alpendre, e no seu sitio construirase un muro de cantería de cerramento. Ademais, construirase unha beirarrúa de 150 metros, e ampliarase  o pontón que xa hai nunha das marxes.•