Ata o 30 de outubro pode verse en Chantada a exposición «Pinceladas galegas, trazos mediterráneos», que recolle un total de cincuenta pezas da longa traxectoria creativa do pintor e arquitecto chantadino Manuel Jorge. A inauguración desta mostra, a primeira retrospectiva en Galicia da obra deste senlleiro creador, terá lugar na Casa da Cultura de Chantada o sábado 3 de setembro ás 19 horas. A continuación, ás 20 horas, terá lugar un concerto homenaxe a Manuel Jorge no Auditorio Municipal de Chantada, con Manuel López Jorge e Javier López Jorge ao piano, e Mª Victoria Jericó e Luis López Jorge ao violín.
A exposición está estructurada en dous espazos, que recollen as dúas épocas creativas de Manuel Jorge. Na Casa da Cultura amósase unha escolma da primeira época de Jorge, de carácter figurativo e con predominio dos retratos, e principalmente xestada na súa Chantada natal, ou ben vinculada temáticamente con Galicia. Por outra banda, a Sala de Exposicións do Auditorio Municipal concentra unha mostra da producción dos últimos anos deste creador chantadino, marcada polo carácter abstracto e relacionada nos seus trazos con planos e fotos da súa arquitectura.
A mostra está comisariada por Alba Sánchez e María Tomé, que plantearon este proxecto dende a dualidade do artista como pintor galego e arquitecto mediterráneo.
Cargando ...
