• A conselleira de Medio Rural, Ángeles Vázquez, achegouse á zona vitivinícola de Amandi, en Sober, para coñecer os danos producidos polas treboadas de mediados de agosto.

IMPORTANTES DANOS
A titular autonómica visitou a zona ao día seguinte de producirse as incidencias climatolóxicas, que causaron a perda de preto de 400.000 quilos de uva, nunha extensión de arredor de 50 hectáreas de viñedo. Ademais, rexistráronse danos nas infraestruturas das explotacións, con caída de muras e deterioro do firme das pistas de acceso aos viñedos. Os primeiros cálculos daban como resultado unhas perdas de preto de 500.000 euros.
O propio presidente da Xunta, Alberto Núñez Feijóo, anunciou días despois que o Goberno autonómico vai habilitar unha orde de axudas de 500.000 euros para compensar a perda de produción, e outros 100.000 euros para reparar danos en muras e accesos.
Os viticultores trasladaron a súa preocupación á conselleira, xa que o vindeiro ano só se vai poder recuperar un terzo da produción actual. A conselleira de Medio Rural comprometeuse a colaborar para a recuperación destas perdas.•

• As treboadas de mediados de agosto provocaron danos en preto de 6 hectáreas de viñedo na zona de Soutelo, dentro do municipio de Monforte. O alcalde, José Tomé, e o concelleiro de Servizos, José Luis Losada, achegáronse á zona para coñecer o alcance dos danos, que afectaron a máis de 150.000 quilos de uva, “entre o 70% e o 80% da colleita, e nalgúns casos o 100%”. Ademais da merma na produción, as vides víronse afectadas, así como as muras e os camiños. Co fin de facilitar o traballo dos viticultores, o Concello desprazou unha pá de cadeas, para habilitar os preto de dous quilómetros e medio de pistas afectadas.•