As Rutas do Románico na Ribeira Sacra continúan ata o 15 de outubro

• O Consorcio de Turismo Ribeira Sacra continúa ofrecendo o programa Rutas do Románico cada semana ata o 15 de outubro. Nestas rutas combínanse a arte e a natureza, con visitas a puntos de interese turístico a maiores dos entornos patrimoniais de arte románica.
VISITAS POLO SAVIÑAO
Os mércores desenvólvese a Ruta do Románico de O Saviñao, con saída ás 16,30 horas da igrexa de Santo Estevo de Ribas de Miño. A visita continuará polas igrexas de San Paio de Diomondi e Santa María de Seteventos, para rematar do dolmen de Abuíme.
MONUMENTALIDADE E NATUREZA EN SOBER
A Ruta do Románico de Sober ten lugar os xoves, saíndo ás 16,30 horas de diante do edificio do Concello de Sober. O itinerario inclúe a igrexa de San Xulián de Lobios, San Vicente de Pinol, Santa María de Proendos, o souto de Lobios e o mirador de Santiorxo.
O GRAN ROMÁNICO DE PANTÓN
Os venres é a quenda do románico de Pantón, o concello con máis densidade monumental desta arte en Galicia. A ruta iníciase ás 16,30 horas dende o Mosteiro das Bernardas de Ferreira, para continuar visitando a igrexa de San Miguel de Eiré, Santo Estevo de Atán, e San Vicente de Pombeiro.
SÁBADOS DE ROMÁNICO POLA COMARCA DE CHANTADA
As rutas do sábado organízanse en sesións de mañá e tarde, con itinerarios pola comarca de Chantada. Así, os sábados pola mañá desenvólvese a Ruta do Románico de Carballedo, con saída ás 10,30 horas dende diante do Concello en A Barrela. O itinerario inclúe Santiago de Lousada, San Xoán da Cova e Santo Estevo de Chouzán.
Os sábados pola tarde son o espazo para a Ruta do Románico de Chantada-Taboada. A expedición parte ás 16,30 horas dende a Oficina de Turismo de Chantada, para visitar San Salvador de Asma, Santa María de Camporramiro, Santa María de Pesqueiras e San Pedro de Bembibre.
RECOMENDACIÓNS PARA REALIZAR AS RUTAS DO ROMÁNICO DA RIBEIRA SACRA
As Rutas do Románico son guiadas, e realízanse en coches particulares dos participantes, que deberán presentarse no punto de saída á hora sinalada. A saída está garantida, independientemente do número de persoas que se presenten. Ademais, non é preciso reserva.
Dende a organización informan de que o acceso ás igrexas de Santa María de Pesqueiras e San Xoán da Cova só pode facerse a pé, polo que recomendan levar calzado cómodo. Así mesmo, advirten de que as rutas poden verse modificadas a criterio do guía, debido á celebración de oficios relixiosos ou a imprevistos doutra natureza.
O prezo por persoa e ruta é de 6 euros, ive incluído. Os nenos e nenas menores de 14 anos participan gratis.
VISITAS FÓRA DE RUTA
Como complemento ás Rutas do Románico, dende o Consorcio de Turismo recomendan aos participantes que se acheguen, fóra de ruta, a diversos enclaves monumentais de gran interese artístico e patrimonial desta zona. Entre eles, está a ruta dos Mosteiros, xa en terras ourensás, e integrada polo de San Pedro de Rocas, no municipio de Esgos; o de Santo Estevo de Ribas de Sil, en Nogueira de Ramuín; o mosteiro de Santa María de Xunqueira de Espadanedo; o de Santa Cristina de Ribas de Sil, no concello de Parada de Sil; e o de Santa María de Montederramo, tamén na provincia de Ourense.•

Deixa unha resposta

Your email address will not be published.

Enquisas

ESTÁ CONFORME CO PROXECTO PARA CONSTRUÍR UNHA NOVA PONTE DE FERRO NO MALECÓN EN SUBSTITUCIÓN DA PASARELA PEONIL ACTUAL?

Cargando ... Cargando ...

Resumen mensual de noticias

Nova Anterior

Aprobado o programa provincial Ben Empregado 3 con novidades para fomentar a inserción laboral

Seguinte Nova

O monfortino Dani de la Torre será homenaxeado na gala final da 38ª Semana de Cine de Autor de Lugo

Últimas noticias sobre ASOCIACIONISMO

Chantada contra o cancro

A solidariedade e a conciencia social uníronse en Chantada nunha loita colectiva contra o cancro. No pasado mes de decembro, a directiva
Ir aInicio

Don't Miss