Primeira retrospectiva en Galicia da obra do pintor e arquitecto chantadino Manuel Jorge

• Baixo o título “Pinceladas galegas, trazos mediterráneos”, a Casa da Cultura e o Auditorio Municipal de Chantada acollen esta apaixonante viaxe polas dúas etapas creativas de Manuel Jorge • A mostra está aberta ata o 30 de outubro

El pase de diapositivas requiere JavaScript.

• “Pinceladas galegas, trazos mediterráneos” constitúe a primeira retrospectiva en Galicia sobre a obra do pintor e arquitecto Manuel Jorge, nacido en Chantada e afincado en Alicante. Este proxecto, comisariado por Alba Sánchez e María Tomé, fai fincapé na obra relacionada coa súa vivencia de Galicia dende a diáspora. Precisamente, a intensidade da presenza do espíritu galego na obra pictórica de Jorge foi o que impulsou o proxecto curatorial de Sánchez e Tomé, que viaxaron ata a localidade alicantina de Xávea para coñecer en profundidade a Manuel Jorge, “unha persoa entrañable e visionaria a partes iguais que falaba un galego doutro tempo”, explican no dossier de presentación da mostra. “Cremos que a través das súas pezas  Manuel continuou vivindo dalgunha maneira na nosa terra, e iso foi o que máis nos interesou”, suliñou Alba Sánchez.
MANUEL JORGE “É PARTE DA NOSA HISTORIA”
A necesidade de redescubrir en Galicia a obra de Manuel Jorge supuxo un impulso para botar adiante o proxecto. “É importantísimo dar a coñecer a súa obra; sabemos da súa relevancia en Valencia, pero dende logo non aquí, e isto é grave porque é parte da nosa historia”, comentou Mercedes Vázquez, presidenta de Airoá Comunicación, impulsora do proxecto no que colaboran a Fundación Manuel Jorge e o Concello de Chantada.•

• Manuel Jorge, unha vida adicada á creación entre Galicia e o Mediterráneo

• Manuel Jorge naceu en Chantada en 1929. Segundo refire o dossier que acompaña á exposición, parte da súa obra arranca das lembranzas dos primeiros anos da súa vida: “A infancia é o máis importante que nos pasa na vida, é o que nos forma”, afirma o pintor e arquitecto. A Casa de Lemos, actual Casa da Cultura, conserva aínda agora elementos daquela Chantada da primeira metade do século XX. Por este motivo, é este o espazo expositivo para as obras pictóricas que recollen as lembranzas chantadinas de Manuel Jorge, a primeira época creativa entre os anos 1958 e 1982, agás o retrato azul da súa nai co que se abre a exposición, e que data de 2002.
Manuel Jorge trasladouse a Madrid para preparar o ingreso na Escola Superior de Arquitectura. O seu paso pola capital sírvelle para mergullarse na riqueza dos seus museos e formarse en debuxo. En 1959, xa licenciado, volve a Chantada e adícase á pintura de xeito autodidacta. Pasa o ano 1960 en Menorca, adicado á creación pictórica, e fai as súas primeiras exposicións en Madrid. En 1961 trasládase a Cadaqués, onde coñece á que será a compañeira da súa vida, a pintora finlandesa Christina Snellman.
Tralo seu paso por Alicante, onde desenvolve os seus primeiros proxectos arquitectónicos, a parella inicia unha serie de viaxes por Europa e o resto do mundo. A partir dese momento, Manuel Jorge desenvolverá as súas dúas grandes paixóns, a arquitectura e a pintura, mantendo esta última en segredo durante décadas. Deste segundo periodo proceden as obras expostas no Auditorio de Chantada, presididas por un gran retrato da súa compañeira nesta travesía creativa.•

Deixa unha resposta

Your email address will not be published.

Nova Anterior

Ata o 5 de outubro poden solicitarse as axudas da Deputación para melloras en servizos públicos no rural

Seguinte Nova

Reclaman para as rutas xacobeas por Lugo máis sinalización, maior seguridade, e xestión como elementos culturais

Últimas noticias sobre ASOCIACIONISMO

   
A %d blogueros les gusta esto: