• A conselleira de Infraestruturas en funcións, Ethel Vázquez, supervisou a comezos de outubro as obras de mellora na estrada LU-901 entre A Barrela e a provincia de Ourense, e nas que a Xunta inviste 600.000 euros. Os traballos, que comezaron no mes de xullo, están xa executados nun 70%, polo que se prevé que estean rematados a finais de ano.

BEIRAVÍAS E MELLORAS NO FIRME
Segundo explicou a conselleira de Infraestruturas en funcións, as actuacións neste vial teñen como obxectivo mellorar “de forma notable” a seguridade na estrada que une a comarca de Chantada e O Carballiño. Os traballos consisten, por unha banda, na ampliación da vía para dotala de beiravías. Ademais, en determinados treitos, ao paso polos pequenos núcleos de poboación onde hai vivendas á marxe, en lugar de beiravías construiranse cunetas aptas para o tránsito das persoas, co obxectivo de proporcionarlles aos peóns unha circulación cómoda e segura.
Por outra banda, a actuación inclúe reforzos de firme nos treitos máis urbanos desta vía, como na travesía da Tolda, onde xa se remataron os traballos, e na travesía da Barrela, onde tamén xa se renovou o firme. Así mesmo, estase a mellorar a sinalización e o balizamento. •