• Alumnado de Bioloxía do IES A Pinguela participou nunha ruta científica dirixida polo xeólogo ourensán Eduardo G.Clavijo
• A natureza concebida como unha gran aula foi o escenario dunha actividade organizada polo Departamento de Bioloxía do IES A Pinguela, para o alumnado de Bacharelato que cursa dita asignatura. Na última semana de setembro, os escolares monfortinos saíron do centro para percorrer unha ruta científica por terras da comarca de Lemos e as ribeiras do río Sil. Durante a expedición, estiveron guiados polo xeólogo ourensán Eduardo G.Clavijo.
A primeira etapa desta viaxe científica tivo lugar no monte Marroxo, onde lembraron brevemente a historia do noso planeta e a orixe da vida. De seguido, coñeceron a formación xeolóxica da Fervenza do Cachón no río Vaos e a zona das Marmitas de Xigantes.
Unha vez no municipio de A Teixeira, o grupo puido estudar a formación coñecida como Ollo de Sapo, e analizar a súa singular tipoloxía de rocas.
Logo dun descanso na Fábrica da Luz, continuaron desenvolvendo o traballo de campo dende a pasarela do río Mao, observando as características do granito desta zona, tendo en conta a súa dureza e o que isto significa para a paisaxe e os asentamentos humanos nesta zona.
Por último, nas proximidades de Monforte, os estudantes puideron observar a estrutura das arxilas que integran o terreo do val de Lemos, así como detectar as fallas na súa configuración.•
