• O Consorcio de Turismo Ribeira Sacra pon en marcha esta fin de semana a segunda edición do programa “A caída da folla na Ribeira Sacra”. Esta iniciativa terá lugar durante 4 fins de semana consecutivos dende o 29 de outubro ata o 20 de novembro.

APROVEITAR A RIQUEZA PAISAXÍSTICA E NATURAL DO OUTONO, E AMPLIAR A TEMPADA TURÍSTICA
Segundo explicaron os responsables do Consorcio, o programa ten como obxectivo aproveitar as posibilidades paisaxísticas e naturais que ofrece o outono na zona para o desenvolvemento de actividades turísticas.
Así mesmo, dende o Consorcio destacan a importancia deste tipo de iniciativas, que axudan a ampliar a tempada turística e camiñar cara á “tan ansiada desestacionalización do sector”.

ACTIVIDADES VARIADAS NA NATUREZA
A programación inclúe un total de 9 actividades, que van ter lugar tanto en terras lucenses como ourensás. Roteiros de sendeirismo, degustación de produtos do outono, fotografía ao aire libre, tradicións orais asociadas á estación e á natureza son algunhas das propostas do programa “A caída da folla na Ribeira Sacra”.

RUTAS EN KAYAK
“Outono a vista de río” é o nome da actividade que inclúe rutas en kayak polos ríos Sil e Miño. A primeira cita será o sábado 29 de outubro dende o embarcadoiro de A Abeleda, en Castro Caldelas, e a segunda o domingo 13 de novembro dende a área recreativa de Maiorga, en Pantón. Esta actividade, apta para principiantes, inclúe equipamento completo e charla sobre seguridade e manexo da embarcación a cargo de 3 monitores. As rutas ofrecen entre 16 e 40 prazas, cun prezo por persoa de 8 euros, que dá dereito a participar no sorteo dunha noite de aloxamento nun establecemento de turismo rural.

MICOLOXÍA E DEGUSTACIÓNS DE OUTONO
A recollida de setas é un clásico do outono, que o Consorcio de Turismo Ribeira Sacra está a aproveitar a través da actividade “Cestas e ao bosque!”. Como o ano pasado, realizaranse obradoiros de formación, saídas ao campo, clasificación de exemplares e degustacións. A organización aporta o material, composto por navalla, guía micolóxica, caderno e bolígrafo, e está incluído o almorzo e o xantar. A actividade oferta entre 7 e 15 prazas, a un prezo de entre 40 e 15 euros, segundo se é dobre xornada, só unha ou media xornada. Os menores de 12 anos pagan a metade. Ademais, sortearanse cestas de mimbre entre os participantes.

BUSCAR TESOUROS POLO MONTE E REMATAR CUN MAGOSTO
O geocatching para adultos no bosque centra a actividade “Castañas e carriozas”, guiada por monitores experimentados en GPS, na busca de tesouros no medio do monte. A xornada rematará cunha merenda tipo magosto. Esta actividade terá lugar na tarde do sábado 29 de outubro, nos bosques de castaños de Parada do Sil.

FOTOGRAFÍA A PÉ DE RUTA POLO BOSQUE
A fotografía e o sendeirismo protagonizan a actividade denominada “Paisaxes de outono”. Dous roteiros cunha duración aproximada de 3 horas desenvolveranse dentro deste programa. Ao longo das camiñatas, realizaranse paradas suxeridas polo profesor de fotografía, para captar as mellores condicións de luz e cor na natureza. Ao mesmo tempo, varios monitores irán explicando aos participantes as características que presenta o bosque nesta época do ano. A actividade ofrece entre 15 e 30 prazas, a un prezo por persoa de 5 euros, incluíndo viaxe de regreso en autobús. Ademais, haberá un sorteo dun paseo en zodiac polo Miño para dúas persoas.

DÚAS RUTAS FOTOGRÁFICAS
A primeira ruta fotográfica desenvolverase o sábado 12 de novembro ao longo dun traxecto de 8,4 quilómetros á beira do río Loio. O grupo partirá ás 16,30 do punto de encontro, situado nas Piscinas Municipais de Paradela. A segunda e última ruta terá lugar o sábado 19 de novembro, con nove quilómetros de ruta polos Canóns do Sil, saíndo ás 10 horas da Praza de Luíntra, en Nogueira de Ramuín.

TRADICIÓN ORAL VINCULADA Á NATUREZA
O programa deseñado polo Consorcio de Turismo Ribeira Sacra complétase coa actividade “Bosques Máxicos”, que adica un espazo á cultural oral. Acompañados de monitores, os participantes adentrarase no monte e nos viñedos escoitando as lendas e tradicións que a cultura oral conservou sobre estes espazos máxicos. A xornada, que terá lugar o domingo 20 de novembro, está aberta a público de todas as idades. O punto de encontro será na estrada N-540, á entrada da Avenida de Monforte en Chantada, diante do IES Val do Asma.
A actividade, cun máximo de 20 prazas e un mínimo de 10, ten un prezo individual de 10 euros, e de 6 para menores de 12 anos. Inclúe unha comida tradicional e un sorteo de botellas de viño da Denominación de Orixe Ribeira Sacra.

CHEGADA EN COCHES PARTICULARES AO PUNTO DE ENCONTRO
Dende a organización explican que é preciso o uso de coches particulares para desprazarse ata o punto de encontro. Así mesmo, poderanse aplazar as actividades debido á climatoloxía.•