• A mediados do mes pasado comezou o programa AlimentaTIC, unha iniciativa da Fundación TIC da Deputación de Lugo, destinado a promover unha alimentación saudable entre os maiores de 55 anos da nosa provincia.
O presidente da Deputación, Darío Campos, visitou aos participantes do AlimentaTIC celebrado na Pontenova, e destacou a importancia da alimentación en calquera etapa da vida. No caso dos maiores, Campos Conde lembrou a utilidade de ofrecer consellos e formación sobre nutrición saudable empregando ademais as novas tecnoloxías.

DIVULGACIÓN NUTRICIONAL E DEGUSTACIÓN DE PRODUTOS
O programa inclúe a celebración dun total de 15 obradoiros por todas as comarcas lucenses. Durante as actividades, os participantes reciben información sobre as características nutricionais dos alimentos, e sobre como elaborar menús saudables, equilibrados e asequibles. Para isto, o obradoiro dá acceso a unha guía de alimentación en formato dixital co deseño, entre outros exemplos, dun menú semanal saudable e consellos para comer ben por un prezo económico. No obradoiro, hai postos con produtos para degustación dos asistentes, que poden achegarse ao sabor e cualidades nutricionais dos diversos alimentos e das súas preparacións.•