A Xunta entregou en Quiroga novo material para emerxencias por neve

• Quiroga acolleu a entrega dos novos equipamentos para emerxencias por neve que a Xunta destina a un total de nove concellos de Lugo e Ourense.

SEIS EQUIPOS DE COITELAS E TRES DE CUÑAS PARA RETIRAR A NEVE E O XEO
O pasado 28 de novembro, o vicepresidente da Xunta, Alfonso Rueda, acompañado polo delegado territorial da Xunta en Lugo, José Manuel Balseiro, trasladouse a Quiroga para facer entrega de seis equipos de coitelas para os municipios lucenses de Becerreá, Folgoso do Courel e Quiroga, e para os ourensáns de Cualedro, Piñor e Chandrexa de Queixa. Ademais, recibiron tres equipos de cuñas os Concellos de A Gudiña, Castro Caldelas e Maceda.

EQUIPOS “MOI NECESARIOS”
Estes equipamentos foron adquiridos pola Xunta de Galicia, a través da Axencia Galega de Emerxencias, cun investimento de preto de 118.000 euros. Segundo explicou o vicepresidente da Xunta, este material é “moi necesario”, xa que vai permitir mellorar a circulación e a seguridade vial dos veciños destes municipios, nos que son frecuentes as xeadas e nevaradas.
Rueda destacou tamén a importancia de que os usuarios se informen do estado das vías antes de realizar desprazamentos.•