Convenio entre Deputación, Xunta e Concello de Sarria para o financiamento da residencia pública

• A residencia pública da terceira idade de Sarria contará con achegas da Xunta e da Deputación de Lugo para financiar o seu funcionamento. O organismo provincial aportará 120.000 euros a través dun convenio co Concello de Sarria, no que tamén participa a Xunta de Galicia, achegando 6.000 euros.

PARA MANTEMENTO, COMPRA DE MATERIAL E PAGO AOS TRABALLADORES
A partida destinada pola Deputación foi aprobada na Xunta de Goberno do pasado 2 de decembro. Segundo explicou o voceiro do Goberno provincial, Álvaro Santos Ramos, esta partida de 120.000 euros irá destinada a actuacións de mantemento e adquisición de materiais, como sábanas, toallas, pixamas ou batas, co fin de mellorar a atención dos 100 maiores de toda a comarca de Sarria que residen neste centro público. Santos Ramos explicou que a achega provincial tamén servirá para garantir o pago aos preto de 50 profesionais que traballan nesta residencia.

AXUDA SOLICITADA POLO CONCELLO
A colaboración da Deputación foi solicitada pola alcaldesa, Pilar Yáñez, ao mandatario provincial, Darío Campos, nada máis acadar a presidencia. Campos confirmou a súa colaboración na visita realizada á residencia en abril. •