Lugo será a provincia con máis investimento da Xunta por habitante en 2017

• O Goberno galego destinará 3.522 euros por habitante en Lugo e 3.355 euros en Ourense, fronte aos 2.457 na Coruña e 2.728 de Pontevedra, para avanzar no reequilibrio territorial

• As comarcas de Lemos, Chantada e Quiroga contarán con 6 millóns de euros de orzamento específico nas contas da Xunta para 2017

O conselleiro de Facenda, Valeriano Martínez, entregou o proxecto de Lei de Orzamentos para 2017 e de Medidas Fiscais e Administrativas, ao presidente do Parlamento de Galicia, Miguel Ángel Santalices, o pasado 3 de decembro. GPXG
O conselleiro de Facenda, Valeriano Martínez, entregou o proxecto de Lei de Orzamentos para 2017 e de Medidas Fiscais e Administrativas, ao presidente do Parlamento de Galicia, Miguel Ángel Santalices, o pasado 3 de decembro. GPXG
• O Goberno galego vén de presentar o proxecto de Lei de Orzamentos para 2017, no que se incrementa o gasto en todas as Consellerías, e prioriza o investimento por habitante nas provincias de Lugo e Ourense, co obxectivo de seguir avanzando no reequilibrio territorial entre as provincias atlánticas e as do interior. Así o explicou o conselleiro de Facenda, Valeriano Martínez, na entrega ao Parlamento de Galicia o proxecto da Lei dos Orzamentos, así como o de Medidas Fiscais e Administrativas. Este segundo proxecto inclúe, entre outras, unha nova rebaixa fiscal para o rural, que consiste na bonificación da compra de vivenda habitual para mozos, familias numerosas e persoas con discapacidade cando o inmoble estea ubicado nunha zona rural. Ademais, o proxecto de Lei consolida as baixadas de impostos que entraron en vigor en xaneiro de 2016, tanto no IRPF como no Imposto sobre Sucesións, e continuando co programa de impostos cero no rural.
6 MILLÓNS DE EUROS DE INVESTIMENTO ESPECÍFICO NO SUR DE LUGO
As deputadas autonómicas do Partido Popular por Lugo, Raquel Arias e Julia Rodríguez, calificaron de “positivos” os Orzamentos de 2017 para a nosa provincia. En concreto, as deputadas populares destacaron sobre todo os 6 millóns de euros de orzamento específico que o Goberno galego destinará ás comarcas de Lemos, Chantada e Quiroga.
AXUDAS XENÉRICAS QUE BENEFICIARÁN AO SUR DE LUGO
Arias e Rodríguez puxeron en valor as diversas partidas xenéricas que terán incidencia directa na zona sur lucense, como o apoio ao sector do viño, con axudas á produción, organización e internacionalización por valor de 300.000 euros.
Así mesmo, as contas autonómicas inclúen unha partida xeral de 679.090 euros para executar diversas melloras en albergues e no propio Camiño de Santiago.
A conservación ordinaria e o plan de vialidade invernal para 2017 da Xunta destina para Lugo máis de 7 millóns de euros a través da Consellería de Infraestruturas e Vivenda, ademais doutros 5,8 millóns en reforzos de firme e actuacións en travesías na nosa provincia.
ORZAMENTOS “PARA AS PERSOAS”
As deputadas autonómicas insistiron na “importancia das persoas” nos Orzamentos da Xunta para 2017, e que nas comarcas do sur lucense vanse traducir en investimentos concretos. Arias e Rodríguez referíronse á partida de 250.000 euros que a Xunta destinará á construción do novo centro de saúde de O Saviñao, e os preto de 450.000 euros euros para o centro asistencial de Carballedo ou para o centro de continuidade do Infanta Elena, incluído no capítulo VI do texto do proxecto de Orzamentos 2017.
1,3 MILLÓNS DE EUROS PARA SOLO EMPRESARIAL EN TABOADA, QUIROGA E MONFORTE
As contas da Xunta para o vindeiro ano tamén inclúen partidas para o apoio ao tecido empresarial, “cun claro compromiso coas empresas, para ofrecer máis oportunidades de emprego e consolidar proxectos que xa apostan polo sur lucense”, segundo explicaron Raquel Arias e Julia Rodríguez.  Neste sentido, as deputadas populares lembraron que a Xunta destinará a solo empresarial máis de 1,3 millóns de euros para obras en Taboada, Quiroga e Monforte.
PARTIDAS EN INFRAESTRUTURAS DO SUR
As infraestruturas constitúen un apartado importante nos investimentos para o sur lucense. A Xunta prevé 250.000 euros para o acondicionamento da estrada LU-651 ao seu paso por Folgoso do Courel, actuación na que se espera investir 4 millóns máis ata 2019. Este mesmo concello da comarca de Quiroga beneficiarase de máis de 80.000 euros en actuacións de mellora de infraestrutura para servizos de televisión e radiodifusión.
Así mesmo, o vindeiro ano iniciarase o proceso de conversión en autovía do corredor Nadela-Sarria, cun investimento de 250.000 euros en 2017, aos que o Executivo galego pretende engadir outros 16 millóns de euros máis ata 2020. As deputadas populares salientaron que esta actuación daría cumprimento á promesa electoral realizada polo presidente da Xunta, Alberto Núñez Feijóo.
OUTRAS PARTIDAS
No eido do turismo está incluído o investimento de 250.000 euros para mellorar accesos a bens de interese turístico en Sober. O municipio soberino tamén se vai beneficiar dunha das achegas medioambientales que os Orzamentos autonómicos destinan en diversos concellos, e que neste caso se concreta nos 270.000 euros para o proxecto de saneamento na parroquia de Bolmente, en Sober.
Así mesmo, Raquel Arias e Julia Rodríguez destacaron que “esta será a lexislatura do rural”, o que vai repercutir nos investimentos  da Xunta para 2017. Neste sentido, as deputadas autonómicas suliñaron a partida de 3,3 millóns de euros que o Executivo galego destinará ao distrito forestal de Monforte para prevención de incendios, recuperación de zonas afectadas polos lumes, xestión de montes, control de pragas ou recuperación potencial forestal.•

Deixa unha resposta

Your email address will not be published.

Nova Anterior

Ata o 3 de febreiro para inscribirse nos primeiros cursos do LugoWork

Seguinte Nova

O programa DepuEmprego xa dá traballo a 97 persoas na provincia de Lugo

Últimas noticias sobre ECONOMÍA

     
A %d blogueros les gusta esto: