Máis gasto social e máis axudas a asociacións na proposta de Orzamentos municipais de Monforte para 2017

O alcalde, José Tomé, presentou os Orzamentos 2017, xunto á tenente de alcalde, Gloria Prada, o 12 de decembro. GPCM
O alcalde, José Tomé, presentou os Orzamentos 2017, xunto á tenente de alcalde, Gloria Prada, o 12 de decembro. GPCM
•O Pleno do 26 de decembro debatirá a proposta de Orzamentos para 2017 presentada polo equipo de Goberno do Concello de Monforte. O alcalde, José Tomé, deu a coñecer as liñas xerais desta proposta, na que destacou o aumento do gasto social e das axudas ás asociacións. As contas que someterá ao Pleno o Goberno local suman 12.419.839 euros, cun incremento de 116.000 euros, o 1% respecto aos Orzamentos do presente exercicio.
EIDO SOCIAL
José Tomé explicou o detalle das partidas, destacando o incremento nun 6% do gasto social, pasando dos 801.541 euros deste ano a 850.000. A partida para emerxencias sociais tamén medra, preto dun 43%, dende 21.000 a 30.000 euros. Así mesmo, as contas para o 2017 inclúen unha subida das axudas destinadas ao transporte dos universitarios, que medraría dos 9.000 euros actuais aos 12.000. En canto ás axudas a asociacións culturais e sociais, a previsión é manter a partida nos termos actuais, con 24.000 euros en total.
O alcalde anunciou novas axudas con entidades que non contaban con partidas específicas. As contas de 2017 inclúen 5.000 euros para Cáritas e 2.000 euros para Cruz Vermella. Tamén estrearán achegas municipais as sociedades recreativas Fraternal, Círculo Victoria e Casino Ateneo, que se repartirán 8.000 euros. O Concello habilitará 2.000 euros para Semente Monforte, outros tantos para a Asociación de Praceiros, e unha achega similar para a Delegación de Hostalería.
INFRAESTRUTURAS
Nas infraestruturas, o alcalde de Monforte anunciou que as contas do vindeiro ano reservan unha partida de 134.000 euros para a anualidade do convenio que está previsto asinar coa Confederación Hidrográfica do Miño-Sil e a Deputación de Lugo. Segundo explicou Tomé, esta partida permitirá acometer as obras previstas no Plan de Redución de Vertidos.
DEPORTES
O alcalde de Monforte suliñou varias novidades dos Orzamentos que afectan ao ámbito deportivo. A partida destinada a custear actividades medra en 15.000 euros, que é o custe estimado da organización dos Xogos do Eixo Atlántico, que terán sede compartida en Lugo, Sarria e Monforte. Por outra banda, os Orzamentos estiman unha subida do 25% nas subvencións a clubes deportivos. Como gran novidade, Tomé anunciou a creación dunha achega de 5.000 euros destinada a apoiar aos deportistas que participen en campionatos, “pero aínda habería que definir ben as condicións destas axudas”.
OUTRAS PARTIDAS
Outra novidade destacada polo rexedor local é a creación dunha partida de 8.000 euros para adquirir novos equipos de comunicación para a Policía Local. Así mesmo, elévase nun 3%, ata chegar aos 100.000 euros, a dotación para actividades culturais, que inclúen a Feira Medieval.
CRÍTICAS DO PP
A voceira do Grupo Popular, Julia Rodríguez, lamentou que a proposta orzamentaria do Goberno socialista fose “pouco ambiciosa, repetindo erros do pasado”, por incluir investimentos en saneamento “cando segue aberto o conflicto con Aqualia”. Ademais, Rodríguez precisou que a subida no gasto social anunciada por Tomé “débese a un incremento nas transferencias da Xunta para novos dependentes”.
CRÍTICAS DO BNG
Pola súa banda, a voceira do BNG no Concello, Pilar López, criticou que o alcalde anunciara publicamente “uns orzamentos sen ofrecer con anterioridade ningún diálogo”, nunha actitude “irresponsable e alonxada de toda posibilidade de acordo”.•

Deixa unha resposta

Your email address will not be published.

Nova Anterior

Presentación oficial dos deportistas do Korbis

Seguinte Nova

ACES Sarria traerá en xaneiro as últimas tendencias en celebración no Salón Vodas & Eventos

Últimas noticias sobre ASOCIACIONISMO

     
A %d blogueros les gusta esto: