• O Concello de Monforte vai solicitar á Xunta de Galicia unha segunda parte do obradoiro de emprego que se desenvolveu nos últimos cinco meses na área de Cobas. O alcalde de Monforte, José Tomé, trasladou esta petición ao delegado territorial da Xunta en Lugo, José Manuel Balseiro, cando visitou os traballos na zona o pasado 9 de xaneiro.

POÑER EN VALOR UNHA ZONA DE LECER
“Inicialmente, o Concello tiña un proxecto moito máis ambicioso”, explicou Tomé, en referencia ao obradoiro de emprego solicitado polo Consistorio para o acondicionamento do espazo medioambiental de Cobas. “A solicitude inicial tiña máis módulos e máis traballadores”, precisou, e o que pretende o Concello é completar a recuperación das marxes do río e poñer en valor a zona degradada de Cobas e da Pinguela, “unha zona que cada vez empregan máis veciños durante o seu tempo de lecer”. Por este motivo, o rexedor monfortino adiantou que o Concello vai solicitar un segundo obradoiro para dar continuidade a estes traballos. O alcalde amosou a súa confianza en que a Xunta outorgue ao Concello outra subvención similar neste ano, “o que suporía unha nova oportunidade de formar xente e mellorar a súa empregabilidade nun nicho de emprego tan importante como o medio ambiente”, destacou Tomé.
Pola súa banda, o delegado da Xunta en Lugo, José Manuel Balseiro, destacou a importancia destes programas mixtos de formación e traballo. No obradoiro de emprego de Monforte, 20 persoas recibiron formación remunerada sobre instalación e mantemento de xardíns, ademais doutras 4 persoas en tarefas de xestión e docencia. A Xunta investiu neste obradoiro 179.134,20 euros, que se completaron con 45.100 euros aportados polo Concello de Monforte.•