Balance positivo, nas contas e na dinamización sociocultural, do Círculo Saviñao

•Dende mediados de 1982, ano en que colleu as rendas da sociedade a actual Xunta Directiva, programáronse máis de 400 eventos culturais e de dinamización social

O informe de actividades desenvolvidas dende mediados de 1982 pola Xunta Directiva do Círculo Saviñao deuse a coñecer na última Asamblea anual, celebrada o 26 de febreiro. (Foto cedida).
O informe de actividades desenvolvidas dende mediados de 1982 pola Xunta Directiva do Círculo Saviñao deuse a coñecer na última Asamblea anual, celebrada o 26 de febreiro. (Foto cedida).
• Na última Asamblea anual do Círculo Saviñao, celebrada o pasado 26 de febreiro, a Xunta Directiva presentou un balance positivo, tanto no aspecto económico como na dinamización sociocultural.
ARTE E MÚSICA, PROTAGONISTAS NO CÍRCULO EN 2016
Así, ao longo do ano 2016, o Círculo Cultural Recreativo Saviñao organizou un total de 36 actividades, con especial protagonismo das exposicións pictóricas e fotográficas, con media ducia de eventos, ademais dunha decena de actuacións musicais. No intenso calendario de actividades do Círculo Saviñao houbo tamén espazo para presentacións de libros e un audiovisual, representacións teatrais, os bailes de Entroido e Fin de Ano, e a asistencia á XXII Romaría da Federación Galega de Círculos e Casinos.
SUPERÁVIT DE 12.000 EUROS O ANO PASADO
O balance tamén foi positivo nas contas, que rexistraron un superavit de 12.000 euros. Segundo informaron dende a Xunta Directiva, a liquidación de 2016 presentada á Asamblea anual, ofrece uns ingresos de 39.284,03 euros, e un gastos de 27.233,53.
A Asamblea do Círculo Saviñao, sociedade que actualmente conta con 168 socios, aprobou o orzamento para o ano en curso, que ascende a 38.400 euros.
REFERENTE NA DINAMIZACIÓN SOCIOCULTURAL NO SUR DE LUGO
A Asamblea anual celebrada a finais de febreiro serviu tamén para facer balance da traxectoria de xestión da actual Xunta Directiva do Círculo Saviñao. Dende que o equipo actual, con algunhas variacións, tomara as rendas da sociedade recreativa cultural de Escairón a mediados de 1982, a entidade amosou un gran dinamismo na aposta por ofrecer un espazo de acción e reflexión cultural, sen esquecer o aspecto lúdico e social.
Ao longo destes anos, o Círculo Saviñao de Escairón acolleu preto dun cento de conferencias sobre un amplo abano de temáticas, a cargo de persoeiros de relevancia local e autonómica. Ademais, a sede desta sociedade cultural ofreceu unha decena de ciclos de conferencias en torno á actualidade política de Galicia, na que interviñeron os máis destacados protagonistas do mundo político da nosa Comunidade.
A música foi outro dos eixos da actividade do Círculo Saviñao, sumando preto de medio cento de concertos e actuacións musicais, e máis dunha vintena de actuacións de música coral. O teatro e a presentación de libros centraron máis de 60 eventos, ademais de actividades e iniciativas de distinto tipo, como a suscrición popular  realizada en 1999 para o monumento a don Juan López Suárez, creación do artista Juan Puchades Quilis.
A actividade continúa en Escairón, coa vista posta nas “vodas de diamante” do Círculo Saviñao, que cumplirá 60 anos en 2018.•

 

Deixa unha resposta

Your email address will not be published.

Nova Anterior

O centro de día de Chantada, exemplo da utilidade social do Plan Leader

Seguinte Nova

Unha mirada ao Entroido Ribeirao no Centro Sociocultural de Bóveda

Últimas noticias sobre ASOCIACIONISMO

A %d blogueros les gusta esto: