•Na Mesa de Turismo celebrada na cidade do Cabe participaron representantes de 40 entidades e concellos da Ribeira Sacra •O deputado de Turismo resaltou a “gran acollida” que tiveron as 5 mesas de traballo celebradas na provincia, nas que estiveron representadas preto de 200 entidades
A fase de consulta sumou un total de cinco reunións, desenvolvidas ao longo da provincia, e nas que participaron representantes de preto de 200 entidades e municipios. O deputado de Turismo, Eduardo Vidal Baamonde, agradeceu a gran participación de organismos, asociacións e municipios, e amosouse satisfeito pola gran cantidade de propostas recollidas con este sistema participativo, de cara á elaboración do Plan Estratéxico de Turismo da provincia de Lugo. “Este plan vainos permitir impulsar o sector turístico para lograr un modelo máis competitivo, innovador e sostible”, apuntou Vidal Baamonde.
A metodoloxía empregada nas Mesas de Turismo impulsadas pola Deputación plasmouse en varias dinámicas de grupo realizadas polos asistentes, para detectar as debilidades e fortalezas de cada un dos xeodestinos que hai na provincia. Nesta liña de traballo de “escoita activa”, segundo a definiron os responsables provinciais, a fase de consulta do Plan Estratéxico de Turismo completouse coa realización de entrevistas en profundidade con expertos, ademais de enquisas en liña a colectivos do sector turístico.
A elaboración do Plan continuará nunha segunda fase, adicada ao procesamento dos datos obtidos e á elaboración dunha diagnose do sector, e sobre a que se basearán as liñas estratéxicas e os plans de acción, especificados tanto a nivel provincial como en cada un dos catro xeodestinos lucenses. O Goberno provincial ten previsto presentar o documento do Plan Estratéxico o vindeiro mes de xuño.
Segundo sinalou o alcalde de Monforte, José Tomé, na reunión mantida na cidade do Cabe, “o turismo move hoxe o 11% do Produto Interior Bruto, e tamén unha porcentaxe semellante do emprego”. O alcalde de Monforte suliñou a importancia do xeodestino Ribeira Sacra, “fundamental dentro da provincia de Lugo”. Na Mesa de Turismo celebrada en Monforte, os asistentes destacaron como principais recursos deste xeodestino a paisaxe, a cultura do viño e o Románico. Tamén identificaron como puntos débiles da Ribeira Sacra as deficiencias nas estradas, a mala sinalización dos recursos turísticos, e o abandono do rural.
Así mesmo, os participantes coincidiron en destacar como unha oportunidade para este xeodestino a posible declaración da Ribeira Sacra como Patrimonio da Humanidade.•
O Goberno provincial garante o servizo de catamaráns
•Record de reservas para Semana Santa: 2.000 máis que o ano pasado
• A Xunta de Goberno do 24 de marzo aprobou “por vía de urxencia” os trámites para poder poñer en marcha o servizo de catamaráns da tempada de Semana Santa. Finalmente, será TRAGSA a encargada do funcionamento deste servizo dende abril a decembro.
Segundo explicou o presidente da Deputación, Darío Campos, o seu equipo de Goberno e os técnicos provinciais traballaron “nunha solución para iniciar a actividade das Rutas Fluviais en abril, tal como estaba previsto”, logo de que se bloquease a súa “inmediata” posta en marcha dende SUPLUSA. O bloqueo xurdiu ao non acadar a maioría absoluta necesaria na votación no SUPLUSA da convocatoria pública para a selección do persoal, xa que o PP abstívose e o BNG votou en contra, ao non aceptarse a enmenda que presentaran para manter o persoal do ano pasado.
Campos destacou que “buscamos a solución máis áxil e axustada á legalidade para non demorar o funcionamento das Rutas Fluviais”. O mandatario salientou que “sabemos da importancia da súa posta en marcha para a provincia e os veciños, establecementos e Concellos da Ribeira Sacra”. Neste sentido, o deputado de Turismo, Eduardo Vidal, informou aos alcaldes das xestións realizadas con TRAGSA.
A mediados de marzo, contabilizábanse 6.322 reservas ata decembro, das que 874 son para Semana Santa. O presidente destacou a cifra record de reservas rexistradas a estas alturas do ano, ao sumar 2.000 máis que en 2016. •
Cargando ...
