Premiado o programa de FAGAL e Fundación barrié de apoio a familiares de enfermos de Alzheimer no rural galego

Unha das accións formativas para cuidadores do programa Red Paraguas Alzheimer, promovido pola Federación Alzheimer Galicia (FAGAL) e a Fundación Barrié.  (Foto cedida: FAGAL-Fundación Barrié).
Unha das accións formativas para cuidadores do programa Red Paraguas Alzheimer, promovido pola Federación Alzheimer Galicia (FAGAL) e a Fundación Barrié. (Foto cedida: FAGAL-Fundación Barrié).
• O programa Red Paraguas Alzheimer, posto en marcha en 2013 pola Federación Alzheimer Galicia (FAGAL) e a Fundación Barrié, vén de ser galardonado este mes nos Premios do Día Mundial do Traballo Social, na modalidade de boas práticas.
APOIO AOS COIDADORES E ATENCIÓN AOS ENFERMOS
Segundo explicaron dende a Fundación Barrié, o programa Red Paraguas Alzheimer ten como obxectivo apoiar ás familias con persoas enfermas de Alzheimer no rural galego, ofrecendo atención e apoio directo aos coidadores, ademais de unidades de memoria aos afectados. Así mesmo, o programa pretende fomentar o asociacionismo baixo o amparo, a experiencia e a coordinación das entidades xa existentes.
Dende a Fundación Barrié
presentaron unha memoria das actividades desenvolvidas dentro do programa Red Paraguas Alzheimer. No aspecto de información sobre sintomatoloxía que poden presentar os afectados, realizáronse 39 charlas dende o punto de vista sanitario, social e psicolóxico, ás que asistiron un total de 1.053 persoas. Así mesmo, o programa desenvolveu un ciclo de formación, con catro charlas-talleres nas que se dotou aos familiares coidadores de pautas de actuación nas diferentes etapas da enfermidade. En total, realizáronse unha decena de ciclos, que reuniron a 200 participantes.
UNIDADES DE MEMORIA E TRABALLO INDIVIDUAL
Por último, o programa Red Paraguas Alzheimer desenvolveu un total de 5 unidades de memoria, na que tomaron parte 62 persoas, que puideron beneficiarse de técnicas de estimulación cognitiva, actividades de vida cotiá ou musicoterapia, entre outras, e todas elas de eficacia probada, segundo precisaron dende a Fundación Barrié. As unidades de memoria completáronse coa elaboración de fichas individualizadas de cada afectado, e cunha rolda de reunións periódicas co participante e cos seus familiares.
Os premios do Día Mundial do Traballo Social, convocados polo Colexio Oficial de Traballo Social de Galicia, buscan recoñecer, premiar e divulgar traballos de investigación e boas práticas relacionadas co traballo social en Galicia.•

Deixa unha resposta

Your email address will not be published.

Nova Anterior

Aberto o prazo de inscrición no programa Actívate 2017 do Concello de Monforte

Seguinte Nova

Éxito do II Desafío Via Romana de Chantada

Últimas noticias sobre ASOCIACIONISMO

   
A %d blogueros les gusta esto: