• O Hospital de Monforte conta dende este mes cun novo xerente. O 3 de abril, o vigués Iván Sanz Falque foi presentado aos profesionais do hospital monfortino polo conselleiro de Sanidade, Jesús Vázquez Almuiña. Segundo explicaron dende a Consellería, o nomeamento de Sanz Falque inclúese no proceso de renovación que o Sergas está a realizar nas Estruturas Organizativas de Xestión Integrada, para adaptalas aos «novos retos» que deberá afrontar a sanidade pública galega nos vindeiros anos. Na mesma xornada, foi presentado en Santiago o novo xerente do hospital de Verín, Miguel Abad Vila.

MÉDICO ESPECIALISTA EN RADIODIAGNÓSTICO, CON FORMACIÓN EN XESTIÓN SANITARIA
O novo xerente executivo da área sanitaria de Monforte  naceu en Vigo en 1985, é licenciado en Medicina e Cirurxía pola Universidade Rovira i Virgili, e facultativo especialista en Radiodiagnóstico. Ademais, Sanz realizou un master en administración e dirección de servizos sanitarios impartido pola Fundación Gaspar Casal e a Universidade Pompeu Fabra.

RETOS DA XESTIÓN
Entre os retos que deberán afrontar os novos responsables das áreas integradas están, segundo precisaron dende Sanidade, a integración da Atención Primaria e a Atención Hospitalaria, a implantación dun novo sistema de Atención Primaria máis proactivo, resolutivo e próximo á cidadanía, a mellora continua nos centros hospitalarios, e a xestión dos pacientes crónicos e pluripatolóxicos.•