• En Marea reclama melloras no saneamento dos ríos da comarca de Lemos e na súa contorna fluvial. A mediados de abril, varios responsables desta formación visitaron Sober e O Saviñao para comprobar in situ o estado de deterioro e contaminación da rede fluvial desta comarca.

DETERIOROS EN CANAVAL E O SAVIÑAO
Os deputados de En Marea no Parlamento galego, Davide Rodríguez Estévez e Paula Vázquez Verao, xunto á eurodeputada de AGE Lidia Senra, achegáronse ata a zona do Cubeiro, en Canaval, onde comprobaron o deterioro ecolóxico deste espazo. Os parlamentarios, acompañados de veciños de Sober, lembraron que o anuncio do Concello soberino da posta en marcha dunha intervención de acondicionamento moi demandada pola veciñanza «será insuficiente» se non vai acompañada dunha mellora no saneamento do río Cabe en Monforte. Os deputados de En Marea denunciaron que o Cabe chega a Canaval «convertido nun río moi contaminado», con repercusións na flora e fauna deste caudal.
A continuación, os parlamentarios de En Marea comprobaron os efectos dos verquidos dunha planta láctea no río Pesqueiras, no Saviñao, que producen malos olores e dan un aspecto «morto» ao río.•