Máis dun millón de euros para mellorar a calidade da peregrinaxe no Camiño Francés

•Convenio entre a Xunta e 11 concellos desta ruta xacobea •As melloras buscan manter o Camiño «en condicións óptimas»

Sinatura do convenio entre Turismo de Galicia e 11 concellos galegos do Camiño Francés, o 11 de abril. GPXG
• Os concellos galegos vinculados ao Camiño Francés van contar co apoio económico da Xunta de Galicia para acometer diversas melloras en infraestruturas, servizos e promoción desta ruta xacobea. Esta colaboración materializouse o pasado 11 de abril, coa sinatura dun convenio entre Turismo de Galicia e os municipios de Arzúa, Melide, Monterroso, Palas de Rei, Paradela, Pedrafita do Cebreiro, O Pino, Portomarín, Samos, Sarria e Triacastela. Segundo este convenio, a Xunta aportará máis dun millón de euros ao longo dos anos 2017, 2018 e 2019, para financiar actuacións en ditos municipios.
O 63% DOS PEREGRINOS DO ANO PASADO FIXERON O CAMIÑO FRANCÉS
Segundo explicou a directora de Turismo de Galicia, Nava Castro, este investimento vai permitir «manter o Camiño Francés en condicións óptimas para os milleiros de peregrinos que, cada ano, escollen esta ruta para chegar a Compostela». Castro lembrou que o ano pasado, a capital de Galicia recibiu a 277.854 peregrinos, unha cifra «histórica» que supera o dato do último Ano Xacobeo. Ademais, o 63% destes peregrinos percorreron o Camiño Francés para chegar a Compostela.
MELLORA DA RUTA E DA SÚA CONTORNA
Nava Castro explicou que o convenio abrangue varios tipos de actuacións. Por unha banda, financiaranse melloras nas infraestruturas e bens do Camiño Francés, co fin de prestar unha boa acollida ao peregrino. Neste grupo, inclúense obras de conservación e reposición por razóns de urxencia, obras de mellora no Camiño e a súa contorna, e o establecemento e dotación de áreas de descanso.
O convenio tamén vai financiar gastos dos concellos en iluminación pública ou recollida de lixos nas zonas vinculadas ao Camiño, así como en actividades promocionais, culturais e artísticas.
INFORMACIÓN TURÍSTICA CONTINUA
Neste sentido, a directora de Turismo de Galicia destacou a importancia do convenio para garantir unha atención e información «continuada e específica» aos peregrinos ao longo de toda esta ruta xacobea. En virtude deste convenio, os concellos comprométense a contratar persoal con formación en turismo e coñecementos do Camiño de Santiago no periodo que vai dende abril a setembro. Ademais, terán que manter actualizada a información do Camiño nas súas webs  municipais. •

•REFORZO DA SINALIZACIÓN AO LONGO DO CAMIÑO DE INVERNO

• Turismo de Galicia iniciou, a mediados de abril, a colocación de novas sinalizacións no Camiño de Inverno. O día 12 deste mes, quedou instalada unha mouteira no concello ourensán de A Rúa, co obxectivo de reforzar os sinais xa existentes.
A Xunta ten previsto colocar un total de 140 mouteiras en 14 municipios polos que transcorre esta ruta xacobea, entre os que están Quiroga, A Pobra de Brollón, Monforte de Lemos, Pantón, O Saviñao, Chantada e Sober, na provincia de Lugo. Segundo explicaron os responsables da Xunta, esta iniciativa realizouse de común acordo cos municipios do Camiño.
Pola súa banda, a directora de Turismo de Galicia lembrou que a ruta está pendente da delimitación oficial da Dirección Xeral de Patrimonio da Xunta de Galicia, polo que con esta actuación se reforza, con carácter provisional, a sinalización actualmente existente no Camiño. Castro insistiu na importancia de garantir a seguridade dos peregrinos, e de facilitar a súa peregrinaxe polas diversas rutas xacobeas ao seu paso por Galicia.•

Deixa unha resposta

Your email address will not be published.

Nova Anterior

A gran festa da lectura no Día do Libro en Bóveda

Seguinte Nova

A XVII Mostra do Aceite de Quiroga celebrarase o 28 de maio no muíño de Bendilló

Últimas noticias sobre ASOCIACIONISMO

     
A %d blogueros les gusta esto: