• O pasado 5 de maio, celebrouse en Sarria o congreso extraordinario da formación local de Novas Xeracións, no que foi proclamado presidente Jesús Rodríguez Martínez. O novo responsable desta agrupación, que presentou o triple de avais necesarios para promover a súa candidatura, aceptou o posto «con total orgullo e responsabilidade, ao igual que os integrantes do meu equipo».

A NOVA DIRECTIVA QUERE DESENVOLVER «UN PROXECTO ATRACTIVO PARA A MOCIDADE»
Logo da súa proclamación, Jesús Rodríguez, emprendedor sarriao de 24 anos vinculado ao sector cárnico e á distribución, deu a coñecer a xunta directiva coa que pretende desenvolver un «proxecto atractivo para a mocidade». O equipo, encabezado por Rodríguez Martínez, inclúe a Sandra Fernández Limeres como vicepresidenta, Serafín Pontón Rodríguez como secretario, e Ismael Torres Balboa como coordinador, ademais de Andrés Fernández Díaz e Vanesa Pontón Rodríguez, que exercerán de vogais da xunta executiva local.

CANDIA PEDIULLES «TRABALLO E ILUSIÓN»
Na súa proclamación como líder de Novas Xeracións de Sarria, Jesús Rodríguez estivo arroupado pola presidenta do PP de Lugo, Elena Candia. «Sodes o futuro», lembroulles a dirixente dos populares lucenses, e insistiu en que «sodes necesarios para que Sarria volva a ser o que era». Candia recoñeceu o «compromiso deste mozos e mozas» que toman o rumbo da formación política porque «o facedes a cambio de nada», e pediulles «traballo, traballo e máis traballo», aínda que tamén «ilusión».

O SECRETARIO XERAL DO PP DE GALICIA REIVINDICOU QUE «SER MOZO E SER DO PP HOXÉ É UN XEITO DE SER REBELDE»
Pola súa banda, o secretario xeral do Partido Popular de Galicia, Miguel Tellado, afirmou no acto de proclamación de Rodríguez como novo presidente de Novas Xeracións de Sarria que «ser mozo e ser do PP hoxe tamén é un xeito de ser rebelde». «É ser rebelde contra o pensamento único que nos quere impoñer o populismo, e tamén ser rebelde contra os que nos din que non somos modernos nin somos xente do común», apuntou Tellado. •