• A Deputación de Lugo vén de iniciar os trámites de contratación dunha nova edición do Movémonos, o programa deportivo, saudable e social que o organismo provincial ofrece a concellos pequenos e colectivos sociais.

CLÁUSULAS SOCIAIS NO CONTRATO DESTE PROGRAMA
Segundo explicou en rolda de prensa o presidente da Deputación, Darío Campos Conde, este programa conta cunha achega provincial de 119.000 euros. A finais de abril, iniciouse o proceso de contratación desta iniciativa para os anos 2017 e 2018. O mandatario provincial salientou que este contrato incorpora cláusulas sociais, “de xeito que o adxudicatario deberá contratar a un mínimo de 14 profesionais, que non poderán recibir menos de 15 euros por hora de traballo”. Con esta medida, “melloramos as súas condicións salariais respecto do convenio do seu sector, o de instalacións deportivas e ximnasios, que establece 6 euros por hora”, precisou o mandatario provincial.
A finalidade destas cláusulas é, segundo apuntou Campos Conde, “defender aos traballadores e ás persoas con capacidades diferentes”.

DESTINATARIOS DO PROGRAMA
O programa Movémonos ofrece máis de 8.000 horas de actividades, que van dirixidas a asociacións de todos os concellos de menos de 5.000 habitantes, e a colectivos con capacidades diferentes ou en risco de exclusión social de toda a provincia. En total, poderán participar no programa máis de 80 colectivos lucenses, que se beneficiarán de xeito totalmente gratuíto de actividades de ximnasia ou mantemento, entre outras.
O ano pasado, o programa provincial Movémonos contou coa participación de 1.300 veciños vinculados a máis de 80 asociacións.
Campos Conde salientou que o obxectivo do Movémonos é favorecer o rural da provincia, e a igualdade de oportunidades en todos os concellos.•