A Deputación destina este ano 300.000 euros para a residencia de maiores da Pobra do Brollón

•Ademais, Campos Conde destacou que o organismo provincial vai atender ao dobre de maiores cos servizos que xa financia  •No último ano, a Deputación achegou á Pobra do Brollón un total de 890.000 euros

Na súa visita á Pobra do Brollón, o 18 de xullo, o presidente da Deputación estivo acompañado polo tenente de alcalde, Ricardo Rodicio, e varios membros da Corporación. GPDL
• O Orzamento da Deputación de Lugo para 2017 inclúe unha partida de 300.000 euros para a construción dunha residencia de maiores  con 30 prazas na Pobra do Brollón. Esta foi unha das medidas máis destacadas do balance de investimentos provinciais que fixo o presidente da Deputación, Darío Campos Conde, na súa visita ao municipio, o pasado 18 de xullo. O mandatario provincial, que estivo acompañado polo tenente de alcalde da Pobra do Brollón, Ricardo Rodicio, e varios membros da Corporación local, destacou que, no último ano, a Deputación leva investidos 890.000 euros en servizos públicos para os 1.700 veciños do municipio. Desta cifra, 320.000 euros corresponden ao Orzamento de 2016, e os 566.000 restantes incluénse nas contas provinciais desta anualidade.
PRÓXIMA SINATURA DO CONVENIO DA RESIDENCIA
«Buscamos aumentar a prestación dos servizos sociais na Pobra do Brollón», destacou Campos Conde ao respecto da construción da residencia, da que se está a redactar o proxecto de obra e o convenio de colaboración que a Deputación vai asinar «proximamente» co Concello. «O noso obxectivo é ir incorporando novas partidas nos vindeiros orzamentos, de xeito que as obras estean listas neste mandato», salientou. O convenio establecerá as partidas que achegará a Deputación ata 2019, e a aportación de 200.000 euros por parte do Concello, que tamén cederá o espazo correspondiente na Avenida do Outeiro.
MÁIS MAIORES ATENDIDOS ESTE ANO
Campos Conde insistiu na atención aos maiores que está a financiar a Deputación, a través do Servizo a Domicilio a persoas non dependentes e a Teleasistencia, que xa benefician a 38 maiores neste municipio, con máis de 24.000 euros. O mandatario provincial precisou que este ano vaise incrementar a partida, co que se duplica o número de usuarios ata un mínimo de 76.
MELLORA DE ACCESOS NOS ÚLTIMOS MESES
O Orzamento deste ano tamén inclúe achegas para mellorar os accesos de Abelaira a Transmonte, a Lama de Lor, Tudriz, de Veiga a Picas, Veiga, Eirexa e Aldea de Riba, ademais da dotación dun aseo e un quiosco á área recreativa de Samugueiros.
Con cargo ás contas provinciais do 2016, arranxáronse accesos municipais en Ferreiros, Santalla de Rei, Campo-Fornelas, Salcedo, Ferreirúa de Abaixo, de Piño a Centais, Eixón, á subestación de Renfe e en Santiago de Castroncelos. A Deputación tamén deu resposta a unha demanda dos veciños, empresarios e comerciantes da Pobra de Brollón, co arranxo dun tramo de 2 quilómetros da estrada LU-P-4710. Este vial une a LU-652 coa capitalidade municipal, e ademais soporta un importante tráfico vinculado ao sector da madeira.
Así mesmo, a partida de 320.000 euros da pasada anualidade serviu para instalar 121 novos puntos de luz LED nas parroquias de Ferreirúa, Pacios de Veiga e nos núcleos rurais de Domiz e Nugais. Ademais, financiou a colocación de varios invernadoiros en San Pedro de Cereixa, a mellora do equipamento da Casa da Cultura Olga Novo, e a renovación de saneamentos, traídas de auga e locais sociais en varios puntos do municipio.
EMPREGO
Os investimentos provinciais na Pobra do Brollón xeraron nun ano 10 novos postos de traballo, a través dos programas DepuEmprego e Ben Empregado, cunha partida de 100.000 euros para asumir os custes laborais destes novos traballadores. A previsión para o que queda de ano é crear outros 7 novos empregos.
APOIO A EVENTOS CULTURAIS E DEPORTIVOS
As aportacións provinciais de 2017 servirán tamén para apoiar iniciativas culturais como o IV Festival de música tradicional As cores de Outono, a XXV Feira do Viño de Vilachá, a IV Feira Medieval  Guimara ou o VII Concurso de Cantos de Taberna, entre outros.
Así mesmo, coa partida do 2016, que sumou 50.000 euros, a Deputación financiou a campaña Conciénzate co Deporte, que ofreceu sesións gratuítas de ximnasia para maiores nos centros sociais do municipio, e tamén o Entroido do Oso de Salcedo, entre outros eventos culturais e deportivos.•

Deixa unha resposta

Your email address will not be published.

Nova Anterior

Espazos emblemáticos de Monforte e Sober acollerán os eventos musicais do festival internacional 17º Ribeira Sacra

Seguinte Nova

Sober estrea este verán un observatorio ornitolóxico no Canón do Sil

Últimas noticias sobre GALERÍA

 
A %d blogueros les gusta esto: