• O patrimonio artístico de Chantada formará parte dos roteiros incluídos en «Monumenta. Andar con arte», unha iniciativa da Consellería de Cultura que se desenvolverá do 5 ao 27 de agosto. Segundo explicou o secretario xeral de Cultura, Anxo Lorenzo, acompañado do coordinador do ciclo, Julio Gómez, esta quinta edición de Monumenta propón «descubrir e vivir o patrimonio cultural galego tras os pasos de camiñantes ilustres», como o xeógrafo Domingo Fontán, o musicólogo Alan Lomax, a fotógrafa Ruth Matilda Anderson, ou o folclorista e investigador Casto Sampedro. Lorenzo salientou que «estes viaxeiros recolleron os seus saberes ou atoparon a súa inspiración ao longo do territorio galego, que percorreron cos ollos abertos e en respecto absoluto co territorio e coa cultura». Este é o espíritu, segundo precisou Lorenzo, que se trata de rescatar con este ciclo.
Monumenta está concebida como unha serie de andainas en torno a varios espazos monumentais e artísticos de Galicia, percorridos da man dun experto.
A andaina do 12 de agosto estará protagonizada polos morcegos da igrexa de Santa María de Pesqueiras, en Chantada. O encontro será ás 11 horas, no sinal que indica o comezo da ruta cara esta igrexa en Belesar. En medio dunha vizosa natureza, e xunto a toda a riqueza das pinturas murais do século XVI e os elementos románicos que amosa, vive unha colonia de morcegos de importancia fundamental para entender o ecosistema e a convivencia neste Ben de Interese Cultural.•
Cargando ...
