Exposición fotográfica de Pili Chaos na Casa da Xuventude de Chantada

•A Casa da Xuventude de Chantada continúa coa súa actividade ininterrompida ao longo do verán, cunha nova proposta cultural coa que dar remate á programación destes meses.
Dende o 21 de agosto, pode verse neste espazo expositivo a mostra fotográfica titulada «A Ribeira Sacra e as súas xentes», asinada pola fotógrafa monfortina Pili Chaos.

 

IDENTIDADES DAS PAISAXES E DAS XENTES
A autora ofrece unha visión diferente das tradicionais imaxes en torno á vendima e ás paisaxes vitivinícolas destas terras. Pili Chaos recolle non só as paisaxes naturais do territorio vinculado ao viño, senón tamén moitos retratos que amosan aos protagonistas en momentos cotiáns da súa vida diaria.
Ademais da singularidade que outorga a cultura do viño ás panorámicas do territorio, Pili Chaos tamén incorpora unha ollada creativa sobre a paisaxe ferroviaria, de tan fonda raigame no Val de Lemos, xunto con instantáneas que rexistran o efecto da néboa, característica desta zona.

MOSTRA ABERTA ATA O 20 DE SETEMBRO
A exposición fotográfica «A Ribeira Sacra e as súas xentes», de Pili Chaos, pode verse ata o 20 de setembro na Casa da Xuventude de Chantada, en horario de tarde.•