O alcalde de Monforte, José Tomé, comunicou aos responsables do club Quixós que o Concello vai colaborar con esta entidade para que o deportista local Andrés Saco poida estar presente no Campionato do Mundo. A proba na que competirá o piragüista monfortino, na modalidade de descenso de augas bravas, terá lugar na localidade francesa de Pau entre o 25 de setembro e o 1 de outubro. No encontro mantido co rexedor monfortino participaron, ademais do deportista Andrés Saco, o presidente do club Quixós, Roberto Baliño, o secretario da entidade, Santiago Díaz, e o vogal José Luis Saco. José Tomé xustificou esta decisión porque «non podíamos permitir que alguén que se clasifica para un mundial deixe de ir por falta de medios». O alcalde argumentou que «Andrés Saco, ademais de representar a España, estará dando a coñecer a cidade de Monforte fóra das nosas fronteiras».•
