Monforte contribuiu con cinco medallas ao triunfo da selección galega no Open de Andalucía de taekwondo

•Os monfortinos Álex Camba, do Neka, e Alejandro Fernández, do Escola Lucense, subiron ao máis alto do podio nas respectivas categorías de técnica •Dobrete de metais para Álex Camba e Elena Varela, do Neka, na proba andaluza

Á dereita da imaxe, Elena Varela e Álex Camba, do Neka, coa medalla de prata en técnica por parellas no Open de Andalucía. (Foto cedida).
• O taekwondo monfortino continúa destacando a nivel nacional, con resultados de primeiro nivel dentro da selección galega. Os monfortinos Álex Camba e Elena Varela, do ximnasio Neka, e Alejandro Fernández, do Escola Lucense, aportaron un total de seis metais ao medalleiro acumulado polo combinado galego no Open de Andalucía, celebrado o 17 de marzo en Málaga. Estes logros deron un gran impulso á selección galega, que se proclamou gañadora da clasificación por equipos.
VARIAS MEDALLAS CON SELO MONFORTINO
Monforte destacou na competición de técnica, e tivo presenza tamén no podio de freestyle. Alejandro Fernández, do club Escola Lucense, conseguiu a medalla de ouro en categoría cadete. Pola súa banda, Álex Camba, do Neka, completou unha xornada dobremente exitosa, ao lograr a medalla de ouro en senior 1 individual, e a de prata en parella con Elena Varela. A deportista do Neka tamén brillou con luz propia no Open de Andalucía, sumando unha medalla de bronce individual na modalidade de freestyle.
Álex Camba, no Neka, logrou a medalla de ouro en técnica, na categoría senior 1, do Open de Andalucía. (Foto cedida).
OPCIÓNS «INTACTAS» PARA A CLASIFICACIÓN DE ÁLEX E ELENA AO MUNDIAL DE PARELLAS
O adestrador do ximnasio Neka, José Mª Vega, tamén seleccionador do combinado galego, amosou a súa satisfacción porlos resultados conseguidos. «Camba por fin conseguiu subir ao máis alto do podio», valorou o técnico monfortino, que deu pistas tamén da importancia do acontecido en Málaga na modalidade de parella. «Coa prata de Elena e Álex, seguimos coas opcións intactas para clasificarse para o mundial», salientou Vega. O seleccionador tamén cuestionou a «máis que discutida decisión arbitral» que relegou a Varela ao terceiro posto no podio de freestyle, «en favor da competidora de Andalucía, que foi prata».
GALICIA, GAÑADORA NAS TRES CLASIFICACIÓNS
A nivel colectivo, a selección galega de taekwondo foi primeira por grupos, tanto na xeral como en técnica e freestyle. O palmarés da expedición galega a Málaga rematou con seis ouros, cinco pratas e dez bronces en técnica, e outros seis ouros, dúas pratas e dous bronces en freestyle.•

Deixa unha resposta

Your email address will not be published.

Nova Anterior

Conta atrás para a celebración da XXXVI Feira do Viño de Quiroga

Seguinte Nova

Pleno total do CV Ribeira Sacra no inicio da segunda fase

Últimas noticias sobre ASOCIACIONISMO

A %d blogueros les gusta esto: