O Consorcio de Turismo Ribeira Sacra ofrece unha ampla programación para a Semana Santa

•O turismo xeolóxico e as rutas polos esgrafiados dinamizan a oferta •Mantéñense as exitosas iniciativas do Viñobús e as rutas do Románico

As rutas xeolóxicas que iniciou o ano pasado o Consorcio permiten coñecer a riqueza patrimonial vinculada á minería histórica e á paisaxe da Ribeira Sacra. Arquivo CTRS
• A Semana Santa na Ribeira Sacra ofrecerá aos visitantes unha ampla variedade de actividades coas que gozar da natureza e mergullarse na riqueza patrimonial e paisaxística destas terras. O Consorcio de Turismo vén de deseñar catro programacións con rutas centradas no viño, a arte, as minas históricas e a ornamentación arquitectónica como eixos principais. As actividades desenvolveranse entre o 29 de marzo, festividade de Xoves Santo, e o 1 de abril, Domingo de Pascua.
CATRO RUTAS DE VIÑOBÚS DENDE OURENSE E MONFORTE
A exitosa iniciativa do Viñobús volve unha tempada máis á Ribeira Sacra, con dúas rutas dende Ourense e dúas dende Monforte. O itinerario que sae da cidade das Burgas o venres 30 desenvolverase pola zona do Miño, con paradas no Ecomuseo de Arxeriz, Centro do Viño de Monforte e degustación nunha adega de Amandi.
Por outra banda, a ruta do sábado 31 que sae de Ourense adicarase á contorna do río Sil, con visitas ao Mosteiro de San Pedro de Rocas, Castelo de Castro Caldelas e Mosteiro de Montederramo, así como paradas en adegas para degustar os viños da Denominación de Orixe. Ambas viaxes ocuparán a totalidade da xornada.
En xornada de tarde terán lugar as rutas do Viñobús que saen de Monforte de Lemos o venres 30 e o sábado 31. Os participantes coñecerán o Mosteiro das Bernardas de Ferreira, e degustarán viños en adegas de Amandi e Belesar.
ROMÁNICO NAS IGREXAS E MOSTEIROS AOS DOUS LADOS DO SIL
As igrexas románicas centrarán as rutas na zona lucense da Ribeira Sacra, programadas para o xoves 29 e sábado 31, en horario de tarde. O itinerario inclúe visitas guiadas ás igrexas de San Xoán de Portomarín e San Facundo de Ribas de Miño, en Paradela.
Nas terras ourensás, os mosteiros serán os protagonistas desta iniciativa do Consorcio. O venres 30 e o sábado 31, ao longo de toda a xornada, a ruta percorrerá, con guía acompañante, os mosteiros de San Pedro de Rocas, Santo Estevo e Santa Cristina de Ribas de Sil.
TURISMO XEOLÓXICO: ENTRE A PAISAXE E A HISTORIA
O Consorcio de Turismo Ribeira Sacra completa a programación desta Semana Santa con dúas rutas xeolóxicas, comentadas por arqueólogos. O xoves 29, en horario de tarde, a expedición partirá do Mosteiro de Xunqueira de Espadanedo, para percorrer o Alto do Rodicio, Balcones de Madrid, Pasarelas do Mao e Cristosende.
A ruta programada para o venres 30 dará a coñecer a minería aurífera romana, un dos atractivos histórico-paisaxísticos que se integra no proxecto de Xeoparque Mundial da UNESCO Montañas do Courel. O percorrido partirá ás dez e media da mañá do Parque dos Condes de Monforte, para visitar Margaride, os miradoiros de Pómez e das Fontes, e Montefurado.
RUTAS DOS ESGRAFIADOS
A posta en valor da arquitectura popular é un dos obxectivos do Consorcio de Turismo nas súas últimas iniciativas. Para a Semana Santa, están deseñadas dúas rutas coas que coñecer en directo a decoración de fachadas con esgrafiados. As viaxes terán lugar o xoves 29 de marzo e o domingo 1 de abril. Unha das rutas ten saída dende Doade, en Sober, para visitar os esgrafiados deste municipio e os de Pantón, para rematar cunha sesión divulgativa sobre esta técnica no Ecomuseo de Arxeriz.
A segunda ruta centrarase en Taboada, con visitas e taller de elaboración de esgrafiados.•

Deixa unha resposta

Your email address will not be published.

Nova Anterior

Máis obras en marcha para levar o abastecemento ás parroquias de Sober

Seguinte Nova

O programa Lugo Termal 2018 beneficiou a 650 maiores lucenses

Últimas noticias sobre GALERÍA

     
A %d blogueros les gusta esto: