A tempada de verán xa comezou nas Piscinas Municipais de Sober. As instalacións, que están abertas de luns a domingo de 13 a 21 horas, ofrecen un amplo programa de actividades e servizos para todos os públicos.

Ademais, este ano o Concello de Sober decidiu acondicionar o espazo da carballeira, para gañar zonas de sombra nas que poder desenvolver parte das actividades programadas.
Entre as opcións para divertirse nas Piscinas Municipais, o Concello de Sober organiza clases de natación para nenos e adultos, así como aquagym ou bibliopiscina, ademais de xincanas, talleres e actuacións musicais.
Así mesmo, as Piscinas Municipais de Sober ofrecen wifi gratis para todos os visitantes. Ademais, está prevista a celebración de dúas festas de inchables. A primeira tivo lugar o 17 de xullo, cun éxito de público, segundo precisaron dende o Concello de Sober. Os responsables municipais agradeceron a alta participación nesta iniciativa. A segunda festa acuática con inchables terá lugar o mércores 8 de agosto.
En canto ás tarifas, a entrada ás Piscinas de Sober para os adultos é de 2,5 euros, mentres que os rapaces de 10 a 15 anos pagarán 1,5 euros. A entrada é de balde para os menores de 10 anos. Tamén hai a posibilidade de adquirir un bono mensual, con descontos respecto ao prezo unitario. Para as familias, o bono custa 40 euros, e o bono mensual individual ten un prezo de 30 euros. •