A Aula UNED de Monforte pon en marcha novos cursos

• Este ano, arranca a Aula Senior con clases de nutrición e dietética, e de arqueoloxía e patrimonio

A oferta formativa de Monforte medra este ano coa posta en marcha da Aula Senior da UNED. Esta iniciativa está pensada para maiores de 55 anos, que queiran acceder á formación universitaria, aínda que tamén se admite a persoas a partir de 50 anos.
A AULA SENIOR INCLÚE VISITAS GUIADAS A MONUMENTOS NA PRIMAVERA
Segundo explicaron o alcalde de Monforte, José Tomé, e a directora da Aula UNED de Monforte, Ana Traseira, este novo servizo ofrece a asignatura de Nutrición e Dietética no primeiro cuatrimestre do curso 2018-2019, e a materia de Arqueoloxía e Patrimonio, no segundo cuatrimestre. Traseira salientou as vantaxes da Aula Senior, que permite obter un diploma pola formación realizada, e vincular a compoñente pedagóxica e a lúdica, xa que ofrece actividades con gran acollida polo alumnado, como visitas guiadas en primavera aos recursos patrimoniais estudados.
TITORÍAS ON LINE CON LUGO
Ademais, a Aula UNED de Monforte, con sede no edificio da Casa da Cultura Poeta Lois Pereiro, segue ofrecendo este curso a posibilidade de estudar os Graos de Psicoloxía, Pedagoxía e Educación Social, así como o curso de Acceso á Universidade para maiores de 25 anos. Estas modalidades contan con titorías presenciais. Así mesmo, e se o alumnado o require, pódense realizar titorías por videoconferencia ou webconferencia dende a Aula de Monforte cos profesores das 21 titulacións que ofrece a UNED de Lugo.
MÁIS CURSOS
A responsable da Aula de Monforte explicou a nova oferta de cursos de Extensión Universitaria. Dende o centro monfortino poden realizarse os cursos de estereotipos de xénero, altas capacidades, propiedade intelectual, xerontoloxía, e prevención do odio e da xenofobia. Traseira salientou que esta oferta de cursos está aberta a incorporar novas accións, para dar resposta ás demandas e intereses do alumnado, do Concello de Monforte e da sociedade.
O alcalde lembrou que o Concello colabora coa Aula UNED a través da cesión dos espazos na Casa da Cultura, e cunha achega anual de 55.000 euros.•

Deixa unha resposta

Your email address will not be published.

Nova Anterior

Comezaron as sesións de ximnasia de mantemento nas parroquias de Sober

Seguinte Nova

A ocupación na Ribeira Sacra medrou 3 puntos nesta Ponte do Pilar

Últimas noticias sobre CULTURA

A %d blogueros les gusta esto: