•Os investigadores Vidal Romaní e Grandal D’Anglade, do Instituto Universitario de Xeoloxía, coñeceron en Quiroga a que será a nova configuración deste Museo
A ampliación do Museo Xeolóxico de Quiroga vén de recibir o apoio da comunidade científica.
NOVA SALA DE AUDIOVISUAIS
A comezos de decembro, o director do Instituto Universitario de Xeoloxía da Coruña, José Ramón Vidal Romaní, e a profesora e investigadora do mesmo centro, Aurora Grandal D’Anglade, achegáronse a Quiroga para coñecer o detalle do proxecto de ampliación deste espazo. Os científicos deron o seu visto bo ás características dunha obra que vai dar máis amplitude ás catro salas actuais, e permitirá dispoñer dunha nova sala adicada a proxeccións audiovisuais.
Vidal Romaní e Grandal D’Anglade estiveron acompañados polo alcalde de Quiroga, Julio Álvarez, e o director do Museo Xeolóxico, Ramón Vila, aos que expuxeron as súas ideas e propostas para ter en conta na ampliación.
O proxecto de mellora do Museo Xeolóxico xurdiu da necesidade de contar con máis espazo para expoñer a totalidade das pezas que custodia a institución. O proxecto xa dispón dunha partida de 71.000 euros, que será financiada en boa medida polo GDR Ribeira Sacra-Courel a través dos fondos Leader. Ademais, unha parte dos traballos desta ampliación estarán a cargo dos participantes no obradoiro de emprego Sillor, promovido pola Xunta de Galicia. •
