• Este Bono dá axudas ás familias para contratar coidadores que atendan en momentos puntuais aos fillos e fillas de ata 12 anos
Ata o 2 de setembro está aberto o prazo para solicitar o Bono Coidado, unha liña de axudas que a Consellería de Política Social ofrece ás familias para custear a contratación puntual de coidadores para os seus fillos e fillas. Como novidade, este ano a subvención tamén sufragará o pago de servizos de ludoteca e outros espazos infantís similares.
PARA CUBRIR A ATENCIÓN AOS CATIVOS EN SITUACIÓNS PUNTUAIS
Os detalles destas axudas explicounos o delegado da Xunta en Lugo, José Manuel Balseiro, quen lembrou as prestacións que ofrece o Bono Coidado, posto en marcha polo Executivo autonómico en 2016. Os custes que se subvencionan con esta fórmula permiten ás familias resolver situacións puntuais, como a atención a un cativo que se puxo enfermo, ou substituír por outro ao coidador habitual debido a unha doenza, ou porque ten que realizar un curso de formación ou asistir a unha entrevista de traballo.
REQUISITOS PARA SOLICITAR O BONO COIDADO
Os requisitos para optar ao Bono Coidado é residir en Galicia, ter fillos ou fillas menores de 12 anos, e unha renda da unidade familiar que non supere os 45.000 euros, ou os 13.500 euros per cápita.
A Consellería de Política Social destina ao Bono Coidado un importe inicial de 1,2 millóns de euros, aunque se ampliará ata dar cobertura a todas as solicitudes.
TAMÉN ATENCIÓN FÓRA DO DOMICILIO
Ata agora, o Bono Coidado só subvencionaba os servizos de atención domiciliaria. Este ano, os beneficiarios tamén poderán custear con esta axuda a contratación de servizos de atención infantil non continuados, como as ludotecas ou espazos deste tipo.
TRÁMITES DE PAGO
O pagamento realizarase logo da presentación, na xefatura territorial da Consellería de Política Social, das facturas correspondentes ao servizo e o xustificante bancario do abono, ou o recibín do coidador se o pago do servizo se fixo en efectivo. •
• O BONO COIDADO, EN CIFRAS
• COBERTURA MÁXIMA: 80 horas entre o 1 de outubro de 2018 e o 30 de novembro de 2019. En familias con máis dun fillo, o Bono cubrirá ata 92 horas
• TRAMOS DA AXUDA:
renda per cápita ata 3.750 € → 14 €/hora de servizo
renda per cápita ata 7.500 € → 11 €/hora de servizo
renda per cápita ata 10.000 € → 9 €/hora de servizo
renda per cápita ata 13.500 € → 7 €/hora de servizo
(As mulleres vítimas de violencia de xénero recibirán a contía máxima, independentemente da súa renda per cápita)
