A defensa da identidade xacobea da Ribeira Sacra cumpriu dúas décadas. O 27 de abril, a Asociación Camiños a Santiago pola Ribeira Sacra celebrou o seu 20º aniversario coa presenza do conselleiro de Economía, Francisco Conde, e o titular de Cultura, Román Rodríguez. Os responsables autonómicos acompañaron á presidenta da Asociación, Aida Menéndez, no percorrido pola exposición de cartelería elaborada por este colectivo ao longo dos anos. A mostra está instalada no Centro do Viño de Monforte, espazo que tamén acolleu a presentación da reedición da “Guía del Camino de Invierno”. Unha memoria dos fitos máis importantes desta Asociación amosouse a través dun vídeo.
A xornada conmemorativa rematou coa música de Amancio Prada, que cantou a esta ruta xacobea no concerto “Cantigas do Camiño de Inverno”, na igrexa dos Escolapios.•
