•A mellor cita galega co cine fantástico e de terror contará coa presenza de Javier Botet, actor que deu vida a varios monstruos de Hollywood
Do 25 ao 28 de xullo, Monforte acollerá unha nova edición do Fancine de Lemos. Esta emblemática cita co cine fantástico e de terror traerá á cidade do Cabe a dous protagonistas excepcionais. Batman e os seus 80 anos de historia servirán de marco para recibir a Javier Botet, actor famoso por dar vida a monstruos e personaxes que quitan o sono. Botet recibirá en Monforte o Premio Honorífico 2019 en recoñecemento á súa ampla traxectoria no cine e na televisión. Ademais, haberá cine no Parque dos Condes, cunha programación integrada por catro películas e as vinte curtametraxes presentadas ao concurso.
ILUSTRACIÓNS ORIXINAIS DUN DOS GRANDES DO CÓMIC DE SUPERHEROES
Coa exposición permanente «Batman 80th Anniversary: In Memoriam Norm Breyfogle», o Fancine de Lemos repasará a historia gráfica dos 80 anos do heroe de Gotham, a través dun percorrido polas ilustracións orixinais realizadas polo artista estadounidense Norman Breyfogle, cedidas á organización do festival polo Club Batman. Acompañando á mostra, poderanse ver tamén obras do artista monfortino Guillermo López.
UN ACTOR IDEAL PARA METER MEDO
Nesta edición, o Fancine de Lemos recoñecerá a traxectoria cinematográfica de Javier Botet, actor nacido en Ciudad Real, que está a desenvolver unha exitosa carreira como actor encarnando a personaxes monstruosos. O seu físico, alterado polo síndrome de Marfan que padece, permitiulle dar corpo, no cine e na televisión, a seres deformes e temibles. Botet, que participou en cintas internacionais como «Expediente Warren: El caso Enfield», ou en famosas series como «Juego de Tronos», participará tamén nun coloquio dentro do programa do Fancine. O actor, que tamén é director de cine e ilustrador, falará sobre o actual cine fantástico e de terror cos directores Óscar Martín e Andrés Goteira, o venres 26 de xullo ás nove e media da noite, no stand do Parque dos Condes.
VINTE CURTAS NO PARQUE DOS CONDES, E «ALIEN» PARA PECHAR AS PROXECCIÓNS DE FILMES
Tamén neste espazo ao aire libre proxectarase, o xoves 25 de xullo ás 22,30, a película «Mamá», de Andy Muschietti, coproducida por Guillermo del Toro, e que foi número un de taquilla en Estados Unidos na fin de semana da súa estrea. Xa ás 24,30, poderase desfrutar da preestrea de «Ghostland», o escalofriante terceiro film de Pascual Laugier.
O venres 26, ás 22,30, o Fancine traerá á pantalla «Summer of 84», de Y.K.Whissell, F. Simard e A. Whissell, unha escalofriante homenaxe ao cine dos 80 protagonizado por adolescentes en apuros. O ciclo pecharase co pase, ás 24,30, de «Alien, el octavo pasajero», no seu 40 aniversario.
Unha vintena de curtas seleccionadas para o concurso poderán verse o 26 e 27 de xullo.•
