Os datos do Ministerio comparan o consumo co mesmo periodo do ano pasado
As semanas de confinamento están a rexistrar un maior consumo de alimentos nos fogares de toda España, respecto ao mesmo periodo de 2019. Segundo a análise de consumo no fogar que publica o Ministerio de Agricultura, Pesca y Alimentación, entre o 30 de marzo e o 5 de abril, periodo correspondente á semana 14 do ano, Galicia experimentou un incremento do consumo de alimentos nos fogares dun 16,5%, aumento que ascendeu ata o 22,2% no conxunto de España.
GALICIA, ENTRE AS COMUNIDADES NAS QUE MENOS SE DISPAROU O CONSUMO DURANTE O ESTADO DE ALARMA
Respecto á segunda semana de confinamento, a subida do consumo en Galicia foi do 3,5%. Esta cifra sitúa á nosa comunidade entre as sete autonomías con menor incremento en dita quincena, por detrás de Navarra (cun -15,6%), País Vasco (-3,9%), Baleares (-2,8%), Castela-León (-0,7%), Valencia (0,7%) e Castela-A Mancha (2,0%). Por contra, as comunidades onde medrou o consumo de alimentos entre o 23 de marzo e o 5 de abril foron Cantabria (35,0%), Extremadura (32,2%) e Aragón (26,8%). A media de incremento neste periodo para o conxunto do Estado foi do 7,1%.
O CONFINAMENTO DISPAROU AS COMPRAS POR INTERNET NUN 84% MÁIS
Os datos por produtos e establecementos de compra que ofrece o Ministerio refírense ao total de España. Segundo este informe, as compras por internet medraron case un 84% durante a segunda e a terceira semana do confinamento. Na segunda semana que os españois permaneceron nos seus domicilios polo estado de alarma, as compras telemáticas creceron un 7,1%, e na tercera o aumento chegou ata o 25%.
AS TENDAS DE BARRIO E OS SUPERMERCADOS DE PROXIMIDADE, OS MÁIS SOLICITADOS
En canto ao tipo de establecementos, os españois volveron á tenda de barrio para comprar durante o confinamento. Os supermercados de proximidade e as tendas tradicionais acadaron os maiores incrementos de venda, cun 30,3% e un 26% máis por riba da media do volumen de alimentos. A subida nos hipermercados foi do 9,2% e nas tendas de desconto do 6%.
UNHA CESTA DA COMPRA MÁIS DE SUPERVIVENCIA NAS PRIMEIRAS SEMANAS, PERO MÁIS LÚDICA SEGUNDO AVANZABA O CONFINAMENTO
Sempre con datos de ámbito nacional, o informe do Ministerio aprecia que as primeiras semanas de confinamento, os españois optaron por mercar produtos de primeira necesidade. Co transcurso dos días, a cesta da compra evolucionou para dar preferencia a produtos máis propios de bares e restaurantes, cun repunte de ata o 50% en viños, cervezas e bebidas espirituosas, ademais de snacks, tabletas de chocolate e froitos secos.
A VENDA DE PAN MEDROU UN 20%
Outro dos produtos que disparou as súas vendas foi o pan, con subidas de ata o 20% na terceira semana do estado de alarma. Xunto ao consumo do pan, medrou a compra de fariña de xeito significativo, segundo explica o informe ministerial.
MÁIS TEMPO NA COCIÑA, PERO MÁIS COMPRA DE PRATOS PREPARADOS
Resulta significativo o aumento na compra de pratos preparados, a pesar de que os españois adicaron máis tempo a cociñar. A venda deste tipo de produtos listos para consumir subiu ata o 23% na terceira semana do confinamento, logo dunha crecida constante nas semanas previas.
CRECEU O CONSUMO DE FROITA E PATACAS
O paso do tempo tamén favoreceu a compra de froita fresca e produtos de horta, que superaron o 23% de incremento nos días previos á Semana Santa. Nesta liña, cómpre salientar a subida no consumo de patacas, que en fresco medrou ata o 31,2%, e transformadas un 31,6%.
MENOS PESCADO FRESCO, E MÁIS CARNE, SOBRE TODO TRANSFORMADA
En canto aos produtos do mar, os españois non se lanzaron a consumir pescado durante o confinamento. No conxunto da pesca, mantense a porcentaxe respecto ao mesmo periodo do ano anterior, aínda que medrou un 37,9% a venda de pescado conxelado, a costa do fresco, que baixou un 4,4%, manténdose o consumo de conservas con cifras propias do ano pasado, cun incremento de -0,7%.
En canto ao consumo de carne, medrou un 22,9% en conxunto, destacando a preferencia pola carne transformada, cun 19,3% máis respecto ao mesmo periodo de 2019.
Cargando ...
