A medida da Consellería trata de dar saída aos produtos afectados polo peche da hostelería e dos mercados de proximidade
O conselleiro do Medio Rural, José González, continúa coa rolda de contactos co sector agroalimentario para tratar de buscar solucións á saída de produtos galegos, afectados polo peche xeral por mor do estado de alarma. Logo da posta en marcha, esta semana, da rede Mercaproximidade, González está a sumar novos distribuidores e cadeas de subministro, para paliar as perdas ocasionadas polo peche da hostelería e dos mercados de proximidade. Os contactos da Consellería establecéronse tamén cos propios produtores, para coñecer de primeira man a súa situación, e as necesidades que plantean para superar esta crise.
A REDE MERCAPROXIMIDADE CONTA XA CON SETE DOS GRANDES DISTRIBUIDORES DE ESPAÑA
Con esta intención, na xornada do 15 de abril, o conselleiro do Medio Rural, José González, mantivo un encontro por videoconferencia co presidente do Consello Regulador da Agricultura Ecolóxica (CRAEGA), Francisco López. O titular autonómico informoulle das xestións que está a desenvolver dende o seu departamento, así como as características da iniciativa Mercaproximidade. Esta rede vén de acadar a adhesión de distribuidores de primeiro nivel, como Gadisa, Froiz, Vegalsa-Eroski, El Corte Inglés, Carrefour e Grupo Cuevas, aos que hai que engadir a recente inclusión de Lidl. Dende a Consellería seguen a traballar para que se sumen á iniciativa as empresas que subministran a colectividades e as plataformas de venda on line. A idea da Consellería é promover tamén a saída, a través deste tipo de cadeas, dos produtos agroalimentarios galegos que contan con certificación ecolóxica.
REQUISITOS PARA ADHERIRSE A MERCAPROXIMIDADE COMO PROVEDOR
González aproveitou a reunión telemática co presidente do CRAEGA para anunciar que xa está aberta a posibilidade de que os agricultores, gandeiros e transformadores de Galicia poidan darse de alta como provedores da rede Mercaproximidade. Os interesados poden enviar os seus datos e o tipo de produción ao enderezo electrónico mercaproximidade@xunta.gal. Para adherirse a esta rede, é preciso estar rexistrado como explotación ou industria agraria, e asinar unha declaración responsable na que conste que un mínimo do 50% dos seus ingresos proveñen da hostalería e dos mercados municipais.
IMPLICAR AO CONSUMIDOR FINAL PARA QUE VALORE OS PRODUTOS DE PROXIMIDADE E AO AGRO GALEGO COMO SUBMINISTRADOR NESTES TEMPOS DE CRISE
En canto ao consumidor, a Consellería vai iniciar unha campaña de sensibilización nos establecementos de venda e nos medios de comunicación. O obxectivo é implicar aos consumidores finais da importancia de mercar produtos de proximidade, pola súa calidade e pola importancia que está a ter o agro galego como subministrador de alimentos durante o periodo de confinamento.
