Novo concerto en directo no Facebook do Concello da Pobra do Brollón

Laura LaMontaigne e PicoAmperio animarán outra sesión do ciclo #CosPésNaCasa, o sábado 18 de abril ás 21:00

Imaxe promocional do concerto que ofrecerán Laura LaMontaigne e PicoAmperio o 18 de abril a través do Facebook do Concello da Pobra do Brollón. GPCPB

O ciclo de música #CosPésNaCasa, que ten en marcha o Concello da Pobra do Brollón para animar o confinamento, ofrecerá unha nova sesión o sábado 18 de abril. A partir das 21:00 horas, poderá seguirse a través da páxina de Facebook do Concello, o concerto en directo de Laura LaMontaigne e PicoAmperio. Os músicos amosarán a súa orixinal mestura de música electrónica e folclore galega e portuguesa.

UN CONCERTO QUE SERÁ “UNHA VIAXE ECLÉCTICA ENTRE A XEOGRAFÍA DE GALICIA E PORTUGAL”

Sobre a vindeira cita musical no Facebook do Concello da Pobra, Laura LaMontaigne considerou que será “unha experiencia ecléctica, unha viaxe tocando diferentes puntos da xeografía galega e portuguesa”. Entre as referencias máis salientables que integran o repertorio de LaMontaigne están Fernando Pessoa, Rosalía de Castro, Luz Fandiño, Airas Nunes ou Martín Códax, xunto a textos de elaboración propia.

MÓBIL, ALTOFALANTE E SUBIR VOLUME PARA DESFRUTAR DESTE CONCERTO DE FUSIÓNS MULTICULTURAIS

LaMontaigne e PicoAmperio lanzaron unha recomendación ao público para ir preparando o concerto. Os músicos propoñen a cada usuario que conecten o móbil a un altofalante e subir o volume, para desfrutar ao máximo da súa fusión de hip-hop, música india, cantigas medievais ou ambient, entre outras influencias musicais.

MÁIS CONTIDOS NAS REDES SOCIAIS DO CONCELLO E EN GUIMARALIA TV

Para ir quentando motores, dende o Concello da Pobra xa subiron ás redes sociais un adianto do que será este concerto. Así mesmo, en breve poderase ver en Guimaralia TV, a canle de televisión de balde que ofrece o Concello, unha entrevista a distancia con Laura LaMontaigne e PicoAmperio, acompañada de varias pezas audiovisuais sobre asuntos de interese, elaborados coa colaboración da veciñanza.

Deixa unha resposta

Your email address will not be published.

Nova Anterior

O Concello de Pantón anuncia máis accións de emerxencia durante a pandemia

Seguinte Nova

Nenos e nenas do colexio de Escairón únense nun vídeo para enviar ánimo e esperanza no confinamento

Últimas noticias sobre CULTURA

     
A %d blogueros les gusta esto: