O Concello iniciou o reparto das mascarillas reutilizables e adaptadas aos cativos
Os cativos de Sober comezaron a recibir as mascarillas adaptadas que o Concello adquiriu para protexer a este sector da poboación ante o próximo permiso de saída á rúa. O Goberno local adquiriu un lote de mascarillas infantís, en dúas tallas, para entregar dúas por cada neno. Segundo informaron os responsables municipais, estas pezas son reutilizables, e van acompañadas dun manual de uso con indicacións oficiais avaladas polo Ministerio de Sanidade.
REPARTO A DOMICILIO COS DEBERES DO COLEXIO
O reparto faise casa por casa, aproveitando a entrega dos traballos correspondentes ao terceiro trimestre escolar. A distribución a domicilio está a cargo de membros de Protección Civil.
Este material dará protección aos nenos de 3 a 12 anos, seguindo as indicacións das autoridades sanitarias. Para os menores de 3 anos, non está recomendado o uso deste tipo de pezas.
Cargando ...
