Xa hai encargada outra partida municipal de 100.000 unidades para adultos, e 15.000 mascarillas infantís
Na xornada do 27 de abril, empregados municipais de Monforte iniciaron o reparto a domicilio das 70.000 mascarillas adquiridas polo Consistorio, que se destinan á protección da veciñanza fronte ao coronavirus. O reparto organizouse por zonas estratéxicas, agrupando as entregas segundo a proximidade, e trala comprobación previa do censo municipal, xa que estas unidades van destinadas só aos empadroados na cidade do Cabe.
Segundo informaron dende o Concello de Monforte, cada beneficiario recibe 3 mascarillas, entregadas por empregados municipais debidamente equipados con todas as medidas de illamento, para evitar contaxios.
PRÓXIMA RECEPCIÓN DOUTRAS 100.000 MASCARILLAS DE ADULTO, E 15.000 PARA NENOS
O alcalde, José Tomé, salientou que esta acción “é un esforzo importante” que o Concello realiza “para facilitar aos monfortinos, na medida das nosas posibilidades, os recursos de protección tan necesarios nestes tempos”.
Tomé aproveitou para adiantar a próxima recepción dun segundo lote de mascarillas sanitarias, adquirido polo Concello. A nova partida de material de protección, composto por 100.000 mascarillas de adulto e outras 15.000 infantís, recibiranse “nos vindeiros días”.
Cargando ...
