Sober permitiu só postos de alimentación, e Bóveda retomará o mercado de Rubián con varios pulpeiros na nave aberta
A vida cotiá vai recuperando os seus costumes tralo parón pola crise sanitaria. As feiras do mes volven ofrecer a súa tradicional cita coa veciñanza, pero de xeito mesurado e con medidas de seguridade.
Logo de que Monforte abrira o calendario de mercados hai uns días, limitando o aforo e a presenza de postos, Sober tomou o relevo o pasado 12 de maio, permitindo só a venda de produtos alimentarios. Os visitantes puideron tomar o pulpo na Bodeguilla de Marce, ou levalo para a casa.
POSTOS DE ALIMENTACIÓN E POLBO NA NAVE ABERTA DE RUBIÁN O DÍA 14
Idéntica situación é a que prevé o Concello de Bóveda para o mercado do día 14 en Rubián. A nave aberta será o lugar escollido para instalar os postos de venda de verduras, hortalizas e queixos, entre outros produtos agroalimentarios. Neste espazo estarán tamén varios pulpeiros, que colocarán mesas separadas para servir o produto.
Con todo, os concellos non baixan a garda, e recomendan aos visitantes o uso de mascarilla, e especialmente o mantemento da distancia de seguridade, para evitar posibles contaxios.
