O Concello cortará o tráfico neste punto durante toda a mañá do martes 9 de xuño
Coa chegada do verán, inícianse as tarefas municipais de limpeza de vexetación en varios puntos da cidade de Monforte. Na vindeira semana, desenvolveranse os traballos na Ponte Vella, unha vía urbana con gran valor patrimonial e turístico.
Segundo avanzaron dende o Concello, os labores de limpeza terán lugar na mañá do martes 9 de xuño. A retirada de maleza e da vexetación superficial requerirá da instalación dun guindastre. Por este motivo, será preciso cortar o tráfico neste punto dende as 7:30 horas, e ata o remate dos traballos, que se prevé estean completados ao final da mañá.
UN BEN DE INTERESE CULTURAL “QUE FORMA PARTE DA IMAXE DE MONFORTE”
O alcalde, José Tomé, destacou a importancia do mantemento e limpeza deste Ben de Interese Cultural. Ademais de cumprir cun dos compromisos electorais deste Goberno, Tomé salientou que estes traballos permiten manter “nas mellores condicións” a Ponte Vella, “monumento que forma parte da imaxe da nosa cidade”.
