Os admitidos deberán formalizar a matrícula entre o 15 e o 30 de xullo
O Centro de Formación Audiovisual da Deputación de Lugo retoma o procedemento de inscrición e matrícula para o vindeiro curso 2020-2021. O Centro ofrecerá 20 prazas para cada un dos ciclos, con matrícula gratuíta agás para os alumnos repetidores.
PRAZOS DE INSCRICIÓN E LISTAXE PROVISIONAL
A primeira fase do proceso, a de inscrición, está aberta dende o 22 de xuño ata o 3 de xullo. Os solicitantes deberán presentar, xunto co formulario de inscrición dispoñible na web www.deputacionlugo.gal, unha fotocopia do DNI e a certificación académica. Toda a documentación pode enviarse de xeito telemático a través da web da Deputación de Lugo, ou no propio Centro de Formación Audiovisual, na rúa Frei Plácido Lemos s/n, de Lugo.
LISTAS DEFINITIVAS E MATRÍCULA DO 15 AO 30 DE XULLO
O día 7 de xullo, darase a coñecer a lista provisional de admitidos e excluídos, así como a lista de espera por posibles renuncias, no taboleiro de anuncios do Centro e na web da Deputación. As reclamacións poderán presentarse entre o 8 e o 10 de xullo. A lista definitiva de admitidos, excluídos e en espera publicarase o día 14. A matrícula deberá formalizarse entre o 15 e o 30 de xullo no propio Centro, de 9:00 a 14:00 horas.
CRITERIOS DE ACCESO NO CASO DE QUE A DEMANDA SUPERE Á OFERTA DE PRAZAS
Se as solicitudes superan o número de prazas, darase prioridade aos solicitantes con titulación de bacharelato que se determine para cada ciclo, despois aos que teñan unha titulación de bacharelato distinta, a continuación aos de titulación en técnico superior, e finalmente aos que teñan título universitario. En cada un destes grupos, priorizarase aos solicitantes que se matriculen por vez primeira no ciclo, aos que teñan maior nota media no expediente, e ao sexo menos representado no ciclo formativo solicitado na matrícula do curso anterior.