A arqueoloxía comeza a desvelar en terras soberinas os segredos da mítica Proencia romana

Os restos arqueolóxicos atopáronse a pouca profundidade, revelando moitos datos sobre a configuración dun importante enclave romano do alto imperio.

Sober estase a converter no novo foco de investigación arqueolóxica no sur de Lugo. A comezos deste mes, a escavación que se levou a cabo na parroquia de Proendos vén de sacar á luz, en apenas dez días, un conxunto de restos que confirman, segundo o alcalde de Sober, “que a lenda da mítica Proencia é unha realidade”.

DENDE A ÉPOCA CASTREXA ATA A MEDIEVAL
A escavación, localizada na contorna da casa reitoral de Proendos, revelou a existencia dun importante enclave romano da época do Alto Imperio, ademais de apuntar a unha época anterior e tamén á evolución deste núcleo xa na Idade Media.

XACEMENTO CON ESTRUTURAS DE VALOR
Os indicios da presenza dun posible foso defensivo remontan á cultura castrexa, sobre a que se implantou a complexa estrutura romana. Este conxunto altoimperial amosa un sistema termal complexo e extenso, ademais de varias estruturas relacionadas con usos e servizos públicos. O achado romano revela tamén posibles estruturas de habitación, unha probable trama urbana e incluso estruturas funerarias e un hipocausto, estancia oca que se construía debaixo dos cuartos e os baños para a circulación do aire quente. Destaca unha hipotética horrea romana, un espazo de almacenaxe de cereais que, de confirmarse, sería a máis grande atopada en Galicia, e a primeira vinculada a unha vila romana.
Xa de época medieval serían as posibles tumbas e elementos funerarios que tamén se identificaron na escavación de Proendos.
Os traballos están a cargo da empresa Tempos Arqueólogos. •

Deixa unha resposta

Your email address will not be published.

Nova Anterior

A veciñanza da parroquia pantonesa de Tribás xa conta con rede de abastecemento de auga

Seguinte Nova

Demanda de clases de ukelele na Casa de Música de Chantada

Últimas noticias sobre CULTURA

     
A %d blogueros les gusta esto: